Улсын Их Хурлын Тамгын газраас ажилтнуудын мэдлэг чадварыг дээшлүүлэх, чадавхийг бэхжүүлэх зорилгоор долоо хоног бүрийн Даваа гаригт тодорхой сэдвээр мэдээлэл, сургалт зохион байгуулж байгаа юм. Энэ удаагийн ээлжит сургалтаар Үндэсний статистикийн хорооноос "Статистик мэдээллийн нэгдсэн сан www.1212.mn EzStat, Monstat ann-аас статистикийн тоон мэдээллийг ашиглах" сэдэвт сургалт явууллаа. Сургалтад Тамгын газрын ажилтнууд болон Улсын Их Хурлын гишүүний туслахууд оролцож 1212.mn цахим хуудсан дахь статистик мэдээллийг хэрхэн ашиглах талаар мэдээлэл авав.

Сургалтыг Үндэсний Статистикийн хорооны дарга С.Мэндсайхан нээж, тус газрын Төрийн захиргаа, удирдлагын газрын дарга Т.Гантөмөр, Мэдээлэл боловсруулах технологийн газрын дарга Л.Мягмарсүрэн нар www.1212.mn цахим хуудсыг хэрхэн ашиглах талаар дэлгэрэнгүй мэдээлэл хийлээ.

Статистик мэдээллийн нэгдсэн санг 2012 онд бий болгосон бөгөөд ингэхдээ БНСУ-ын статистикийн байгууллагуудын хэрэглэгчиддээ мэдээллийн санг хэрхэн тархаадаг системийг монголчилж хийсэн гэлээ. Одоогийн байдлаар 1921-2013 оныг хамарсан он, улирлал, сарын давтамжтай улс, бүс, аймаг, сум, багийн түвшингийн 33 салбарын 435 үзүүлэлтийг тус санд агуулсан байна. Мөн санд үндсэн 48 салбарын мэдээлэл гарч байгаа аж. Статистик мэдээллийн нэгдсэн сан www.1212.mn – ыг ашиглахын тулд MiPlatform програм хангамжийг юуны түрүүнд татаж аван суулгасан байх шаардлагатай юм байна.

Статистик мэдээллийн нэгдсэн сан www.1212. mn цахим хуудаснаас iPad, iPhone ашиглан статистикийн мэдээлэл , хэвлэмэл бүтээгдэхүүн буюу сар бүрийн эмхтгэл бусад мэдээлэл , Хүн ам орон сууцны 2010 оны улсын тооллого, Аж ахуйн нэгж байгууллагын 2011 оны улсын тооллого, Хөдөө, аж ахуйн 2011 оны улсын тооллогын мэдээллийг олж авах боломжтой юм.

Түүнчлэн мэдээллийг хүснэгт хэлбэрээр харахаас гадна график хэлбэрээр харж болохын зэрэгцээ 435 үзүүлэлтийг долоо хоног бүр шинэчилж байгаа гэлээ. Өнөөдрийн байдлаар статистик мэдээллийн нэгдсэн сан www.1212.mn-д 2013 оны дөрөвдүгээр сарын статитсик мэдээлэл нэгтгэгдэж хэрэглэгчдэд хүрсэн байна гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.