Монголын шилдэг дасгалжуулагч нарыг төрүүлэн гаргасан ФИДЕ мастер Х.Сүрэндорж агсны нэрэмжит “Их мастерын алдарт хүрэх зам” шатрын нээлттэй тэмцээн эхэллээ. Энэ удаагийн тэмцээнд мэргэжлийн болон сонирхогчийн 260 шатарчин гурван насны ангилалд өрсөлдөж байна. Х.Сүрэндорж агсны гэгээн дурсгалд зориулсан уг тэмцээнийг түүний шавь болон гэр бүлийнхэн нь санаачлан анх удаа зохион байгуулж байгаа юм. Өдгөө Монголын хамгийн өндөр чансаатай шатарчин их мастер Б.Гүндаваа, мөн олон улсын мастер Г.Мөнхгал, ФИДЕ мастер У.Насанжаргал, Э.Болдоо нарын шилдгүүдийг алдрын замд хөтөлсөн Х.Сүрэндорж агсны нэрэмжит тэмцээн швейцарь системээр найман өрөг болно. Тэмцээний аваргууд маргааш тодорно. Дашрамд сонирхуулахад энэ удаагийн тэмцээнд таван их мастер оролцож байгаа юм. Х.Сүрэндорж агсны дурсгалд зориулсан уг тэмцээний үеэр их мастер Б.Гүндаваагаас сэтгэгдлийг сонсоход “Миний багшийг хүндэтгэж тэмцээн зохион байгуулж байгаа гэр бүлийнхэн, Монголын шатрын холбоо, Монголын худалдаа аж үйлдвэрийн танхимын хамт олонд баярлалаа. Багшаараа шавь нар нь үргэлж бахархаж явна. Шавь нарынхаа өдий зэрэг хүрээд явж байгаа багш маань бурхны орноос харж байгаа байх” гэв.