УИХ-ын чуулганы өнөөдрийн хуралдааны төгсгөлд гэнэтийн асуудал оруулж ирсэн нь өчигдрөөс эхлэн маргаан дагуулах болсон Д.Сумъяабазар, Д.Зоригт нарыг тангараг өргүүлэх тухай байв. Сонгуулийн ерөнхий хорооноос 26 дугаар тойрог буюу Сонгинохайрхан дүүрэгт, 10 дугаар тойрог буюу Өвөрхангай аймагт нэр дэвшсэн Д.Сумъяабазар, Д.Зоригт нарын УИХ-ын гишүүний бүрэн эрхийг хүлээн зөвшөөрч, тангараг өргүүлэх эсэх асуудлыг УИХ-д танилцуулж, энэ асуудлаар гишүүд санал шүүмжлэлээ хэлсний дараагаар Д.Зоригт, Д.Сумъяабазар нар тангараг өргөлөө.

УИХ-ын чуулганы өчигдрийн хуралдааныг тасалдуулж, улс төрийн хүрээнд багагүй шуугиан дэгдээгээд байсан энэ асуудлаар намууд тохиролцоонд хүрчээ. МАН-ын зүгээс УИХ-ын дэд даргаар Р.Гончигдоржийг сонгох тухай асуудлаар завсарлага авч, Сонгинохайрхан дүүрэгт дахин санал хураалтаар ялалт байгуулсан Д.Сумъяабазарыг тангараг өргүүлбэл дэд даргын асуудлыг хэлэлцэнэ гэх байр суурь илэрхийлж байсан юм. Харин АН-ын зүгээс Д.Сумъяабазарыг тангараг өргүүлэх тохиолдолд Д.Зоригтыг ч мөн тангараг өргүүлэх ёстой гэдэгт хатуу байр суурьтай байсан билээ. Ингээд энэ асуудлаар өчигдөр УИХ дахь АН болон МАН-ын бүлгүүд тус тусдаа хуралдаж, улмаар чуулганы нэгдсэн хуралдаан тасалдсан юм.

Ямартай ч энэ асуудлаар намууд тохиролцоонд хүрч, Д.Зоригт, Д.Сумъяабазар нарыг хамтад нь тангараг өргүүлэхээр шийдэж. Ингээд өнөөдрийн чуулганы хуралдааны төгсгөлд, Төрийн ордонд хөл татарсны дараа Д.Зоригт, Д.Сумъяабазар нарыг тангараг өргүүлэв.

Ийнхүү УИХ-ын сонгуулиас хойш бараг нэг жилийн дараа УИХ элэг бүтэн боллоо.