УИХ-ын дэд даргаар ажиллаж байсан С.Баярцогт нууц дансны хэргээс болоод албан тушаалаасаа өөрийн хүсэлтээр огцорч, түүний орыг залгах хүнээр Р.Гончигдоржийг сонголоо. С.Баярцогтын тухайд Швейцарийн банкин дахь нууц дансыг олон улсын эрэн сурвалжлах сэтгүүлчдийн холбооныхон олж, гадны хэвлэлээр зарласан. Яг энэ хэрэг явдлын дараа тэрээр хэвлэлийнхэнд мэдэгдэл хийж, албан тушаалаасаа өөрийн хүсэлтээр огцрох тухайгаа хэлж байсан билээ.

Улс төрийн хүрээнийхэн түүний энэ үйлдлийг амиа хаацайлсан үйлдэл хэмээн тодотгож байсан ч нэг хэсэг нь жинхэнэ улстөрч хүний үйлдэл хэмээн тодотгоод байсан. Тэгвэл С.Баярцогт гишүүний орыг залгах хүнээр өнөөдөр УИХ-ын Р.Гончигдоржийг тодруулж, дэд даргаар томиллоо. УИХ-ын чуулганы хуралдаанаар Р.Гончигдоржийг
УИХ-ын дэд даргаар томилох тухай Байнгын хорооны тогтоолын төслөөр санал
хурааж,  хуралд оролцсон гишүүдийн 53,7 хувийн саналаар дэмжжээ.

Одоогоос долоо хоногийн өмнө түүнийг дэд даргаар томилох асуудлаар УИХ хэлэлцсэн ч Ардын намын бүлгийнхэн завсарлага авснаар гацаанд ороод байлаа. Тэд дэд даргын асуудлаар Сонгинохайрханаас сонгогдсон Д.Сумъяабазрыг тангараг өргүүлэхээр барьцаалсан юм. Гэхдээ өнөөдөр УИХ-ын дарга З.Энхболд өнөөдөр энэ асуудлыг дахин хойшлуулах шаардлагагүй гэж үзэн, санал хураалт явуулснаар УИХ-ын ажлын бас нэгэн гацаа арилж, Дэд даргаар сонгогдлоо. Р.Гончигдоржийн тухайд 1990-1992 онд Монгол Улсын дэд ерөнхийлөгчөөр ажиллаж байсан бөгөөд 1996-2000 оны хооронд УИХ-ын даргаар, 2004-2006 онд Ардчилсан намын даргаар ажиллаж байжээ.