Өдгөө 54 настай поп дуучин Мадонна энэ сарын 19-ны өдөр Лас-Вегасын “MGM Grand Garden Arena”-д болох “Billboard Music Awards”-ын шилдэг тоглолтын эзнээр тодрох магадлал өндөр байгаа хэмээн aceshowbiz мэдээлжээ. Учир нь өнгөрөгч онд эхэлсэн нэрт дуучны дэлхийгээр хийсэн “MDNA” аялан тоглолт ашиг орлогын хувьд ч Мадоннаг тэрбумтнуудын эгнээнд бичигдэхэд ихээр нөлөөлсөн байна. Тэрээр 88 өдөр үргэлжилсэн уг тоглолтоосоо 305 сая ам.долларын орлого олсон аж.
 
Түүнчлэн Мадоннагийн тоглолтоо нэрлэсэн “MDNA" цомог нь сүүлийн үед мөн chart-уудын шилдэг борлуулалттай цомгийн тоонд ороод байгаа юм байна. Хөгжмийн ертөнцийн нэр хүндтэй наадмуудын нэг, энэ удаагийн “Billboard Music Awards”-ийг Америкийн алдартай инээдмийн жүжигчин Трейс Морган хөтлөх төдийгүй Женнифер Лопез, Крис Браун, Тейллор Свифт, Жастин Бибер, Pitbull, Ники Минаж, Бруно Марс, Кристина Агелира нарын одод уран бүтээлээ толилуулах гэнэ.