Монгол Улсын Ерөнхийлөгч Ц.Элбэгдорж Төрийн тэргүүн болоод удалгүй Монгол орны ой, цэнгэг усны эх үүсвэр болох Хангай, Хэнтийн нурууд, Хөвсгөл нуурын бүс нутагт Байгалийн нөөцийн үндэсний парк байгуулан унаган төрхөөр нь хадгалан хамгаалж үлдээх санаачилга гаргасан юм. Түүний энэ санаачлагыг 2010 онд шинэчлэн баталсан Үндэсний аюулгүй байдлын үзэл баримтлалд тусгасан билээ.

ҮАБЗ уг асуудлыг хэлэлцэн зөвлөмж гаргажээ. Зөвлөмжид Хангай, Хэнтийн нурууд, Хөвсгөл нуур орчмын бүс нутгийг улсын нөөцөд авч Байгалийн нөөцийн үндэсний парк байгуулах эрх зүйн орчин бүрдүүлэхийг УИХ-д, Үндэсний парк байгуулах ажлыг зохион байгуулахыг Засгийн газарт тус тус зөвлөмж болгоод байна.

ҮАБЗ-ийн нарийн бичгийн дарга Ц.Энхтүвшин УИХ-ын гишүүн, Монгол Улсын Засгийн газрын гишүүн, Байгаль орчин, ногоон хөгжлийн сайд С.Оюунд Байгалийн нөөцийн үндэсний парк байгуулах тухай ҮАБЗ-ийн зөвлөмж, бусад материалыг гардуулан өгөхөөр боллоо. Уг арга хэмжээ маргааш 10.00 цагт Төрийн ордонд болох юм.