УИХ-ын чуулганы үдээс хойшхи хуралдаан эхэлж УИХ-ын Аюулгүй байдал, гадаад бодлогын байнгын хорооны хуралдаанаар хэлэлцэн дэмжсэн Европын сэргээн босголтын банк үүсгэн байгуулагдсаны хэлэлцээрт өөрчлөлт оруулах тухай соёрхон батлах тухай хуулийн төслийг хэлэлцээд дэмжлээ. Энэхүү хуулийн төсөл гишүүдээс 90 хувийн дэмжлэг хүлээв. УИХ-ын чуулганы нэгдсэн хуралдаанд оролцох ёстой 74 гишүүнээс 41 нь оролцов. Тодруулбал, МАН-ын бүлгээс цөөн тооны гишүүн, мөн “Шударга ёс” эвслээс бүлгийн дарга Н.Батцэрэг, бие даагч гишүүд, үүн дээр олонхийн бүлгийн гишүүд голлож оролцлоо.

УИХ-ын дарга чуулганыг өндөрлүүлж хэлсэн үгэндээ маргааш чуулганы нэгдсэн хуралдаан хуваарийнхаа дагуу 09.00 цагаас эхэлнэ гэлээ. Гэхдээ УИХ дахь МАН-ын бүлгийн гишүүд бүлгийн даргынхаа өрөөнд хуралдаад “Чуулганы нэгдсэн хуралдаанд оролцохгүй байх нь зөв” гэсэн байр суурийг түлхүү илэрхийлсэн юм байна. Тиймээс маргааш чуулганы нэгдсэн хуралдаан цагтаа эхлэх эсэх нь тодорхойгүй байгаа юм.

Мөн албан бус эх сурвалжаас авсан мэдээллээр УИХ дахь МАХН-МҮАН-ын "Шударга ёс" эвслийн хувьд Ардчилсан нам, МАН-ын бүлгийн гишүүдийн дунд үүсээд байгаа нэр дэвшигчдийн УИХ-ын гишүүний тангараг өргүүлэх эсэх асуудалд оролцохгүй гэх байр суурийг илэрхийлсэн гэх мэдээлэл байна. Энэ мэдээлэл үнэн бол маргаашийн чуулганы нэгдсэн хуралдаан мөн эгзэгтэй байж мэдэх нь. Бие даагч гишүүдийн хувьд “Д.Зоригтын оронд С.Чинзориг УИХ-ын гишүүний тангараг өргөх ёстой” гэх байр суурьтай байгаа аж.