Өчигдөр Москвагийн цагаар 15.00 цагийн орчим ОХУ-ын Засгийн газрын тэргүүн В.Путины сууж явсан машин Москва хотын төв хэсэг болох Кутузовын өргөн чөлөөнд, Украин зочид буудлаас холгүй осолд оржээ. Нүдээр харсан гэрчүүдийн яриагаар бол В.Путины машины дугуй хагарсан, зарим нь дугуй нь шатсан гэжээ. Засгийн газрын тэргүүний цуваа 140 км цагийн хурдтай явж байсан аж. Дугуй хүчтэй хагарах чимээ гарч, асар хурдтай явж байсан цуваа хурдаа огцом 20 км цаг болтол сааруулсан гэнэ.
Гартаа цүнх барьсан В.Путин гүйн гарч өөр машинд сэлгэж суухыг ч хүмүүс харсан байна. Хамгаалалтын албаныхан асар богино хугацаанд дугуйг сольж цуваа хөдөлсөн аж. Зам дээр хурц иртэй төмөр байсан гэж ослын шалтгааныг үзэж буй аж.
Үүний дараа ОХУ-ын Засгийн газрын Хэвлэлийн асуудал эрхэлсэн нарийн бичгийн дарга Д.Песков мэдээлэл хийж осолд орсон Мерседес Pullman лимузинд Засгийн газрын тэргүүн сууж явсныг нотолжээ. Машины дугуй гэмтсэн ч аюул учраагүй гэж тэрбээр хэлсэн байна.
В.Путины машин осолд орсон нь ганц энэ удаагийнх биш. Өмнө нь Ерөнхийлөгч байхдаа таван ч удаа эрсэдэлтэй байдалд орж байжээ. 2002 онд л гэхэд түргэний тэрэгтэй Ерөнхийлөгчийн хамгаалалтын машин мөргөлдөж дөрвөн хүн хохирч байжээ.

Д.ОЮУН