“Ливерпүүл” болон Данийн шигшээ багийн төвийн хагас хамгаалалтын байрлалд тоглодог Даниел Аггер бэртэл, гэмтлээсээ болоод зодог тайлах талаар нэг бус удаа бодож байсан талаар Данийн BT сэтгүүлд ярьжээ. Тэрээр нуруу болон шагайндаа хэд хэдэн удаа гэмтэл авч байсан бөгөөд одоог хүртэл зовиуртай байдаг аж. Брендон Рожерсийг “Ливерпүүл”-д ирснээс хойш түүний талбайд гарах хугацаа өмнөхөөсөө багассан билээ. Үүнийг түүний бэртэл гэмтэл, настай холбон тайлбарлаж болох талтай. Тэрээр Данийн шигшээ багийн нэрийн өмнөөс 39 тоглолтод оролцож байсан нэгэн юм.

“Би маш олон жилийн карьерыг өнгөрөөсөн гэж бодохгүй байгаа. Надад карьераа дуусгах хэмжээний хүнд бэртэл тулгарч байсан. Хэд хэдэн удаагийн хүнд бэртлийн дараа зодог тайлах талаар бодож, ойр дотныхон маань ч тэгж зөвлөж байлаа. Гэхдээ би яг одоо зүгээр байна гэж хэлье” хэмээн Аггер Данийн BT сэтгүүлд ярьжээ. Даниел Аггер 2006 онд Энфилд цэнгэлдэхэд ирснээс хойш улаануудын нэрийн өмнөөс 208 тоглолтод оролцож байсан юм. Түүнийг энэ жил “Ливерпүүл”-ээс явуулж, зүүн европийн аль нэг лиг рүү явуулах тухай мэдээлэл газар аваад байгаа ч улаануудын зүгээс ямар нэгэн тодорхой хариулт өгөхгүй байгаа билээ.