Жил бүрийн зуны саруудад хотын төвийн замын хөдөлгөөнийг хязгаарлаж, зам засварласнаас хөдөлгөөний ачаалал, түгжрэл нэмэгддэг. Үүнийг шийдвэрлэхийн тулд энэ зун автомашины улсын дугаарын сүүлийн орныг тэгш, сондгойгоор ялгаварлан хөдөлгөөнд оролцуулж магадгүй байгаа аж.

Нийслэлийн авто замын газрын дарга Д.Нанзаддорж энэ талаар “Нийслэлийн авто замын газраас засварын ид ажлын үед буюу зуны саруудад өдөр бүр автомашины дугаарыг тэгш, сондгойгоор ангилж хөдөлгөөнд оролцуулах санал гаргасан байгаа. Нийслэлийн иргэдийн төлөөлөгчдийн хуралдаанаар энэ талаархи хүсэлтээ тавьж, хэлэлцүүлнэ. Дэмжих эсэхийг нийслэлийн удирдлагууд болон иргэд шийдэх байх” гэлээ.