Дуу хөгжмийн ертөнцийн хамгийн алдартай хамтлагуудын нэгд зүй ёсоор багтах “Абба” хамтлагийн музей Шведийн Стокгольм хотноо өчигдөр нээлтээ хийжээ. Тус музейд нэгэн цагт дэлхийг байлдан дагуулж явсан хамтлагийнхны аялан тоглолтоороо өмсөж байсан хувцас, эдэлж хэрэглэж байсан зүйлээс эхлээд бүхий л дурсамжийг илтгэсэн үзмэрүүд багтсан гэнэ. Музейн зохион байгуулагчид энэхүү музейг  Аббагийн олон мянган шүтэн бишрэгчдэд өнгөрсөн дурсамжаа эргэн санаж өнгөрснөөрөө аялах бага ч гэсэн хормыг бэлэглэнэ гэдэгт итгэлтэй байгааг энэ үеэр онцолжээ.

Музейн нээлтэнд хамтлагийн гишүүн Бьорн Ульвеус оролцож “Дуу хөгжмөөр аялсан залуу насныхаа амьдралыг өнөөдөр эргээд харна гэдэг сонирхолтой бас үнэхээр сайхан санагдаж байна” хэмээн өөрийн сэтгэгдлээ хуваалцсан байна. Мөн тэрээр “бид дахин хэзээ ч бүрэн бүрэлдэхүүнээрээ цуглахгүй ч шүтэн бишрэгчидтэйгээ үргэлж хамтдаа байх болно гэдгийг өнөөдрийн үйл ажиллагаа болох энэхүү музей сануулна гэдэгт итгэлтэй байна” гэжээ.

Музейн нээлтийн арга хэмжээнд хамтлагийн гишүүд оролцох тухай эх сурвалжууд мэдээлж байсан ч Бьорн Ульвеус ганцаараа энэхүү арга хэмжээнд оролцсон байна.