Энэ сараас эхлэн манай улс шатахуунаа олон улсаас импортлодог болсон тухай бид өмнө нь мэдээлсэн. Зөвхөн ОХУ-аас, тэр дундаа “Роснефть” компаниас оруулж ирж байсан шатахууны үнэ байнгын өсөлттэй байсан нь өргөн хэрэглээний бараа бүтээгдэхүүн үйлдвэрлэгчдэд төдийгүй үйлчилгээний салбарынханд ч үнэ ханшаа өсгөх шалтаг  болоод байсан билээ. Тэгвэл энэ сараас эхлэн шатахууны үнэ өсөх биш буурлаа гэсэн мэдээллийг бид та бүхэндээ хүргэж байх нь. Чухам хэзээнээс ийн хямдрах талаар бид Газрын тосны газрын дарга Г.Өлзийбүрэнгээс тодрууллаа.

-Бид нарийвчилсан судалгаа хийж, хэд хэдэн газраас шатахуун оруулж ирж байгаа.

БНХАУ, БНСУ, Белорусс зэрэг улсаас шатахуун нийлүүлэхээр гэрээ байгуулан ажиллаж байна. Одоогоор яг хэднээс эхлэн шатахуун хямдрах товыг хэлэх боломжгүй ч энэ сардаа багтаан үнийг бууруулна. Шатахууныг хямдруулж эхлэхдээ нийтэд мэдээлнэ.

-Шатахуун нийлүүлэгчид бүгд нэгэн зэрэг хямдруулах уу?

-Тийм боломжгүй. Эхний ээлжинд аль компани хэдэн төгрөгөөр хямдруулах вэ гэдгийг тухайн үед л мэдэгдэнэ. Нэг нь хямдруулахад нөгөө нь дагадаг зах зээлийн жаягаар цаашид шатахууны үнэ буурахаас өсөхгүй гэлээ.