Хойд Америкийн Үндэсний сагсан бөмбөгийн холбооноос энэ улирлын үнэ цэнэтэй тоглогчоор “Майами Хит” багийн тоглогч Леброн Жеймсийг тодруулж, Монголын цагаар өнөөдөр шагналыг нь гардууллаа. Спортын сэтгүүлчдийн санал асуулгаар тодруулдаг энэхүү шагналын эхний шатанд 120 сэтгүүлчийн санал авч, MVP шагналын эзнийг тодруулсан юм. “Би үнэхээр баяртай байна. Гэхдээ миний хамгийн том хүсэл бол NBA-ын аваргын цомыг дахин хүртэх. Түүхэнд үнэ цэнэтэй тоглогчоор хэр олон удаа шалгарч байсан нь бус баг нь хэр олон удаа NBA-д түрүүлсэн нь л үлддэг шүү дээ. Тиймээс би энэ улиралд заавал түрүүлмээр байна” гэж Леброн Жеймс ярьжээ. Энэ улиралд Жеймс 26,8 оноо, 8 самбараас бөмбөг авалт, 7,3 оновчтой дамжуулалтыг дунджилж байгаа билээ. Мөн түүний онооны хувь 56-д хүрсэн нь карьерын турш дахь өндөр үзүүлэлт юм. NBA-н түүхэнд цорын ганц тамирчин зургаан удаа MVP болж байсан бөгөөд тэр нь Карийм Абдул Жаббар юм. Харин Билл Рассел, Майкл Жордан нар таван удаа, Уилт Чемберлэйн дөрвөн удаа үнэ цэнтэй тоглогчоор шалгарч байжээ.

Леброн Жеймс энэ шагналыг өмнө нь 2008-2010 оны улиралд хоёр жил дараалан хүртэж байсан бол ийнхүү 2011-2013 оны улиралд дахин хоёр жил дараалан MVP болж байгаа нь энэ билээ.