УИХ дахь МАН-ын бүлэг өнөөдөр хуралдаж, дараах асуудлыг хэлэлцжээ. Үүнд, Засгийн газраас хууль эрх зүйн шинэчлэлтэй холбоотойгоор 210 хуульд өөрчлөлт оруулах төслийг УИХ-д өргөн мэдүүлэхтэй холбогдуулан энэ асуудлаар ажлын хэсэг гарган ажиллахаар болжээ. Тодруулбал, хууль эрх зүйтэй холбоотой 400 гаруй хууль байдгаас 210-ыг өөрчлөх нь хэр зүйтэй вэ гэдгийг судлахаар МАН-ын гишүүд болон холбогдох албанаас бүрдсэн ажлын хэсэг байгуулах нь зүйтэй гэж үзсэн байна.

Мөн бүлгийн хуралдаанаар хэлэлцсэн дараагийн асуудал нь Монгол Улсын 2014-2016 оны төсвийн хүрээний мэдэгдлийн тухай хуулийн төслийг хэлэлцэхтэй холбогдуулан Монгол Улсын төсвийн өнөөгийн байдал, гадаад, дотоодын өр зэргийг судалж, мөн Засгийн газраас Монголбанктай хамтран хэрэгжүүлж буй үнэ тогтворжуулах хөтөлбөр, Чингис бонд зэрэг төсвөөс гаднах төсвийн захиран зарцуулалтын талаар дэлгэрэнгүй мэдээлэлтэй болох шаардлагатай байгааг бүлэг онцолсон байна.

Түүнчлэн УИХ-ын дэд даргын асуудлыг өнгөрсөн долоо хоногт УИХ-ын чуулганы хуралдаанаар хэлэлцэх байсан ч МАН-ын зүгээс завсарлага авасан билээ. Энэ удаад ч мөн УИХ-ын 26-р тойрогт нэр дэвшиж, ялалт байгуулсан Д.Сумъяабазарын тангараг өргөх асуудлыг хэлэлцэхгүй бол УИХ-ын дэд  даргын асуудлыг хэлэлцэх боломжгүй гэсэн байр сууриндаа хэвээр байгаа гэлээ.  УИХ-ын дэд дарга С.Бямбацогт “26-р тойрогт ялалт байгуулсан Д.Сумъяабазарын тангараг өргөх асуудлыг СЕХ-ноос өргөн мэдүүлэх ёстой байдаг. Гэвч энэ асуудлыг улстөржүүлэн хойшлуулж байгаад МАН-ын бүлгийн зүгээс хариуцлагагүй алхам гэж үзэж байна. УИХ-ын дарга 76 гишүүнийг бүрдүүлэхэд анхаарал хандуулахгүй бол шат шатны байгууллагад хандах,  Ерөнхийлөгчид  хандах зэрэг улстөрийн акц зохион байгуулахад хүрнэ” гэлээ. Мөн “Хамгийн гол нь ард түмний сонголтыг хүндэтгэж, сонгогдсон гишүүдийг тангараг өргүүлэх нь зүйтэй гэдгийг МАН-ын бүлэг илэрхийлж байгаа” гэв.

УИХ дахь МАН-ын гишүүдээс сонгуулийн санал тоолох машиныг эргэлзээгүй болгохын тулд хуулийн төсөл боловсруулж байгаа гэнэ. Энэхүү хуулийн төсөлд санал тоолох машины дүн эргэлзээтэй болсон үед саналыг гараар тоолох тухай тусгасан бөгөөд боловсруулж дуусаад энэ долоо хоногт УИХ-д өргөн мэдүүлэхээр болсон байна.