Монгол Улсын Ерөнхийлөгчийн сонгуулийн тухай хуулийн дагуу гадаадад ажиллаж амьдарч байгаа иргэдийн санал авах ажлыг зохион байгуулах  комиссыг байгуулсан байна. Уг комисст СЕХ, ГХЯ, УБЕГ-ын төлөөлөл багтсан бөгөөд өнгөрсөн долоо хоногоос ажлаа эхэлжээ.

Тус комиссоос мэдээлснээр, гадаад улс орнуудад амьдарч байгаа монгол иргэдийн саналыг тухайн оронд суугаа Дипломат төлөөлөгчийн газраар дамжуулан зургадугаар  сарын 14, 15, 16-ны өдрүүдэд авахаар болжээ. Энэ хүрээнд, гадаадад ажиллаж амьдарч байгаа, сонгуулийн эрх бүхий иргэдийг Ерөнхийлөгчийн сонгуульд оролцуулах, тэдний саналыг авах ажлыг зохион байгуулах үүрэг бүхий салбар комисс Монгол Улсаас гадаад улсад суугаа нийт 39 Дипломат төлөөлөгчийн газарт байгуулах юм байна.

Сонгуульд саналаа өгөх хүмүүс иргэний шинэчилсэн бүртгэлд хамрагдсан байх ёстой бөгөөд Ерөнхийлөгчийн сонгуультай холбогдуулан гадаадад байгаа иргэдийн шинэчилсэн бүртгэлийг үргэлжлүүлэн хийж байна. Сонгуульд саналаа өгөх иргэд тавдугаар сарын 5-29-ний хооронд Дипломат төлөөлөгчийн газартаа биечлэн буюу факс, цахим шуудан, утсаар бүртгүүлж, санал өгөх эрхээ баталгаажуулахыг Гадаад харилцааны яамнаас сануулав.