Европын хөлбөмбөгийн холбооны хамгийн нэр хүндтэй тэмцээн “Аваргуудын лиг”-ийн хагас шигшээ шатны шийдвэрлэх тоглолтуудын нэг өнөө шөнө 02:45 цагт эхэлнэ.

Испанийн Эзэн хааны гэгддэг “Реал Мадрид” Германы “Боруссия Дортмунд” багийг 85 мянган хөгжөөн дэмжигчийн багтаамжтай “Сантьяго Бернабеу” цэнгэлдэхдээ хүлээн авч, шигшээд тоглохын төлөө өрсөлдөнө. Өнөө шөнийн тоглолт сонирхолтой болох олон шалтгаан бий. Учир нь “Реал Мадрид” эхний тоглолтод “Боруссия Дортмунд” багт 4:1-ийн харьцаатай хожигдсон. Тиймээс өнөөдөр шүүгчийн тоглолт эхлэх шүглийн дуунаас дуусах шүглийн дуу хүртэл өнгөрсөн жилийн Испани болон Германы аваргууд гоол оруулахын төлөө тэмцэх болно. Сүүлийн 11 жилийн турш “Аваргуудын лиг”-ийн тэмцээнд түрүүлээгүй “Реал” амархан бууж өгөхгүй нь ойлгомжтой. Харин 1997 онд ганц удаа энэхүү цомыг өргөсөн Германы “Дортмунд” энэ улирлын “Аваргуудын лиг”-ийн тэмцээнд “Үхлийн хэсэг”-ээс нэгдүгээр байраар шалгарсан, Испанийн “Малага”-г хүнд хэцүү тоглолтын эцэст шүүгчийн мэдлийн цагт буулган авсан амжилтаа хагас шигшээд алдахгүйн төлөө тоглоно.   

-Талбайд ямар тоглосон байх нь хамаагүй. Хамгийн гол зүйл бол үр дүн. Хөлбөмбөгийн хамгийн сайхан нь “математик” бус харин үр дүн байдаг гэж “Реал Мадрид” багийн дасгалжуулагч Жозе Моуриньо тоглолтын өмнө онцолжээ. Учир нь өнөөдрийн тоглолтод талбай дээрээ тоглож буй “Реал” бөмбөг эзмшилт, довтолгооны үзүүлэлтүүд “Дортмунд” багаас илүү байх нь тодорхой юм. Мөн “Реал”-ын тоглогчид гэмтэл бэртэл, хуудасны асуудалгүй учир Жозе Моуриньо доорх гарааны бүрэлдэхүүнээ хүссэнээрээ сонгох юм.

Моуриньогийн сонголтод:

Хаалгач – Касильяс, Адан, Диего Лопес,

Хамгаалагч – Варан, Пепе, Рамос, Коэнтрау, Карвалью, Альбиоль, Начо,

Хагас хамгаалагч – Хедира, Кака, Озил, Хаби Алонсо, Эссьен, Модрич, Кальехон, Ди Мария,

Довтлогч – Роналду, Бензема, Игуаин, Мората зэрэг дэлхийн зэрэглэлийн 22 тамирчин байна.

“Реал” 2002 оны “Аваргуудын лиг”-ийн шигшээ тоглолтод “Байер Ливеркюзен”-ийг буулгавч түрүүлснээс хойш Германы багийг хожоогүй байна. Харин “Дортмунд”-тай хамгийн сүүлд 1998 онд тоглож байжээ.

-Энэ тоглолт миний хувьд түүхэн тоглолт байлаа. Тамирчдаа ийм гайхалтай тоглоно гэж бодож байгаагүйдээ харамсч байна. Дараагийн тоглолт мэдээж хүнд болно. Гэсэн ч бид шигшээд шалгарахын төлөө бүхнийг хийх болно гэж “Дортмунд”-ын дасгалжуулагч Юрген Клооп “Реал”-ыг 4:1-ийн харьцаатай хожсоныхоо дараа хэлжээ.

Энэ хоёр багийн “Аваргуудын лиг”-ийн тэмцээнд хоорондоо тоглосон баялаг түүхгүй ч үзүүлсэн тэнгэр газар шиг зөрүүтэй.

“Реал Мадрид”

• “Реал” энэхүү тэмцээний шигшээ тоглолтод 13 удаа шалгарч, есөд нь түрүүлсэн. Харин “Боруссия Дортмунд” 1997 онд “Аваргуудын лиг”-ийн шигшээд Италийн “Ювентус” багтай тоглож, түрүүлсэн байна.

• Жозе Моуриньо өнгөрсөн улирлын “Аваргуудын лиг”-ийн тэмцээний хагас шигшээд Германы “Байерн Мюнхен”-д хожигдсон.

• “Дортмунд”-д 4:1-ийн харьцаатай хожигдсон нь Жозе Моуриногийн хувьд “Аваргуудын лиг”-т 106 удаа оролцсоны хамгийн том хожигдол байсан юм.

“Боруссия Дортмунд”

• “Дортмунд” энэ улирлын “Аваргуудын лиг”-ийн тэмцээнд дараалан Испанийн багуудтай учраа таарсан. Эдгээр багуудаа талбайдаа буулган аваад байна. Тэд шөвгийн дөрөвт шалгарахын Испанийн “Малага” багийг 3-2-ийн харьцаатай хожсон юм.

• Роберт Левандовски “Реал”-ын хаалганд дөрвөн гоол оруулсан цорын ганц тоглогч боллоо.