Монгол Улсад гурван өдөр чуулсан АОХН-ийн сайд нарын долдугаар бага хурал  өндөрлөлөө. Хуралдааны үеэр Улаанбаатарын тунхаг бичгийг үйлдэж, олон улсад хүргэхээр болов. “Бид маш амжилттайгаар олон улсын хурлыг зохион байгууллаа. Хуралдаанд төлөөлөгчөөр ирсэн хүн бүр 20 жилийн хугацаанд хөгжсөн ардчиллын үйл хэргийг онцолж байлаа. Энэхүү хурлын үеэр бид Ази номхон далайн орнуудын сайд нарын зөвлөлийг зохион байгуулсан. Бид даргалах үүргээ Эль Сальвадорт өгч байгаа ч цаашид ардчилалыг хөгжүүлэх талаар АОХН-ийн үйл хэрэгт идэвхтэй оролцох болно. Эль Сальвадор улсад амжилт хүсье” гэж Гадаад хэргийн сайд Л.Болд хэллээ.

Дараагийн хоёр жилд АОХН-ийг удирдах Эль Сальвадор улсын гадаад хэргийн сайд Хюго Рожер Мартинез “Өнгөрсөн хоёр жилд амжилттай удирдсан Монгол Улсаас бид энэ хариуцлагатай ажлыг авч байгаадаа баяртай байна. Тиймээс бид ардчилалын үйл хэргийг олон нийтэд болоод бүс нутагт, өөрийн оронд төлөвшүүлэхэд өөр бусад улстай хамтран ажиллах болно” гэдгээ илэрхийлэв.

Хуралдааны төгсгөлд ардчилал, хүний эрхийн үйл хэрэгт амжилт гаргасан төр нийгмийн зүтгэлтэн, Мьянмар улсын ардчилалын хөдөлгөөний тэргүүн Ан Сан Су Чи-д Гремекийн шагналыг олгосон бол Пальмерын шагналыг АОХН-ийн Зөвлөлийн Ерөнхийлөгч Роберт ЛаГаммад гардуулсан юм. Төлөөлөгчид маргааш нутаг буцна.