Хөлбөмбөгийн агуу их баяр наадам болох ДАШТ 2014 оны зургадугаар сарын 12-оос долдугаар сарын 13-ны өдрүүдэд Бразил улсад болно.

Рио-де Жанейро хотын “Маракана” цэнгэлдэх хүрээлэнд өчигдөр нөхөрсөг тоглолт болжээ. Тус тоглолт “Рональдогийн найз” ба “Бебетогийн найз” хэмээх багуудын хооронд болсон байгаад Рональдогийн найзууд 8:5-ийн харьцаагаар ялалт байгуулсан байна.

Дэлхийн аваргын 1994, 2002 оны алтан медальт, 1998 оны мөнгөн медальт Рональдо тоглолын дараа хэлэхдээ “Одоо энэ цэнгэлдэх гайхалтай харагдаж байна. “Маракана” цэнгэлдэх бол энэ орны бэлэг тэмдэг билээ” хэмээн өгүүлснийг www.rsport.ru сайтад дурдсан байна.  

Тус цэнгэлдэх хүрээлэнгийн засварын ажил хоёр жил, найман сар үргэлжилсэн байна. Тоглолтын салхийг хагалж шүүглийн дууг хүрээлэнг засварлахад гар бие оролцсон гагнуурчин Антонио Перейра үлээжээ. Мөн тус хүрээлэнгийн анхны тоглолтын үзэхэд 78.000 мянган суудлын 8000 орчмыг бэлэн болгосон байна.

Харин ирэх тавдугаар сарын 15-нд хоёрдахь нөхөрсөг тоглолт болох бөгөөд тус тоглолтод оролцох багийн нэрс хараахан тодроогүй байна. Мөн зургадугаар сарын 2-нд Бразил болон Английн нөхөрсөг тоглолт болох бөгөөд тэр үеэр суудлыг 100 хувь ашиглалтанд орно гэж үзэж байгаа ажээ.