1953 оноос эхтэй Barcelona Open тэмцээн Испаний Барселоно хотноо дөрөвдүгээр сарын 22-28-ны өдрүүдэд болж байна. Тус тэмцээний шигшээд тэмцээний хоёрт эрэмбэтэй Испаний Рафаэль Надаль дөрөвт эрэмбэлэгдсэн нутаг нэгт Николас Альмагротой үлдээд байна. Шороон талбайд гайхалтай тоглолтыг үзүүлдэг Рафаэль Надаль тус тэмцээнд 2005 оноос эхлэн долоон удаа түрүүлэхдээ 2010 онд тэмцээнийг өнжиж байжээ. Өнгөрсөн долоо хоногт өндөрлөсөн мастеруудын цувралийн нэг “Monte Carlo Rolex Masters” тэмцээний шигшээд Надаль дэлхийн манлай теннисчин Сербийн Новак Жоковчид ялагдсан.

Тус тэмцээний шагналын сан 1,7 сая еврод багтаж буй бөгөөд шагналын ганцаарчилсан төрөлд тэргүүлсэн теннисчин 389 мянган еврогийн шагнал хүртэж, чансааны 500 оноо хүртэх ажээ.

Мөн Германы Штутгарт хотноо WTA ээлжит цувралын шигшээд өрсөлдөх теннисчид тодорлоо. Тэмцээний нэгд эрэмбэтэй ОХУ-ын Мария Шарапова, хоёрт эрэмбэтэй Хятадын Ли На нар шалгараад байна. Шарапова өнгөрсөн жилийн тус тэмцээнд Виктория Азаренкаг 6:1, 6:4-ийн харьцаагаар буулган авчээ.

Энэ сард Миамид АНУ-ын Серена Уильямс ялагдсан ч, Indian Wells тэмцээнд түрүүлсэн Шараповагийн ээлжит ялалтууд үргэлжилсээр байна.