Венесуэлийн эрх баригчид ерөнхийлөгчийн сонгуулийн дараа гарсан эмх замбараагүй  байдлыг зохион байгуулсан хэргээр АНУ-ын Калифорни мужийн оршин суугч, америк найруулагч, 35 настай Тимоти Трейсийг (Timothy Tracy) баривчилжээ.

Каракас дахь үймээн. Фото: LEO RAMIREZ / AFP
Венесуэлийн ерөнхийлөгч Николас Мадуро өөрийн тушаалаар америк найруулагчийг баривчилсан гэж пүрэв гаригт мэдэгджээ. Тус орны Дотоод хэргийн сайд нь Трейсийг Америкийн тагнуулын албаны хүн гэсэн байв. Сонгуулийн дараа Венесуэлийн байдлыг эмх замбараагүй болгох зорилгоор сөрөг хүчний залуучуудын бүлгүүдэд тэр мөнгө төлж байсан гэж сайд мэдэгджээ.

Трейсийг Каракасын нисэх буудлаас нутаг буцах гэж байхад нь лхагва гаригийн орой баривчилсан байна. Найруулагч 2012 оноос хойш тус оронд байгаад социалист засгийн газар ба сөрөг хүчний хоорондын сөргөлдөөний талаар баримтат  кино хийж байсан гэж Трейсийн найз нөхөд, хамаатнууд нь сэтгүүлчдэд ярьжээ.

Венесуэльд байх хугацаанд нь Трейсийг хоёр ч удаа баривчлан саатуулж байлаа. Сонгуулиас өмнөхөн тэрээр Пуэрто-Кабелло хотноо болсон  засгийн газрыг дэмжсэн цуглаан дээр зураг авч байхад нь барин саатуулсан байв. Дөрөвдүгээр сарын 14-нд болсон ерөнхийлөгчийн сонгуулиар эрх баригч намаас нэр дэвшигч Николас Мадуро бага зэргийн давуутайгаар ялалт байгуулсан билээ. Сөрөг хүчний лидер Каприлес ба тэдний талынхан сонгуулийг будлиантай болсон гээд дүнг хүлээн зөвшөөрөөгүй юм. Улс даяар эсэргүүцлийн арга хэмжээ болж, энэ үеэр есөн хүн амиа алдсан билээ.