Сүүлийн үед арилжааны банкуудын Вестерн Юнион гүйлгээг ашиглан бусдыг залилан мэхлэх гэмт хэргийн шинжтэй үйлдлүүд гарч, иргэдийг хохироосон гэх хэргийг цагдаагийн байгууллага шалгаж эхэлжээ. Иргэд www.unegui.mn болон  интернет худалдааны вэб сайтад тавигдсан автомашин, эд зүйлийг худалдан авахаар таньж мэдэхгүй, гадаад, дотоодын хүнтэй интернэтээр харилцаж, залилагч этгээдийн санал болгосон Вестерн Юнион гэх хуурамч сайт руу нэвтэрч гүйлгээний мэдээллээ өгч, мөнгөө шилжүүлснээр залилан мэхлэх гэмт хэргийн хохирогч болжээ. Тодруулахад, ийм байдлаар манай улсын хоёр иргэн 7500 ам.долларыг Дани улсын залилагчдын данс уруу гүйлгээ хийж, залилагч нарт мөнгөө алдсан байна.

Цаашид бусдын эд хөрөнгийг залилан мэхлэх гэмт хэрэг нэмэгдэж  болзошгүй  байх тул дараах сэрэмжлүүлэг, зөвлөмжийг цагдаагийн байгууллагаас хүргэж байна. Үүнд:

• Хэнд, ямар зориулалтаар мөнгө шилжүүлж байгаа талаар банкны ажилтанд дэлгэрэнгүй мэдээлэл өгч, зөвлөгөө авах;
• Интернетээр танилцсан үл таних хүнд Вестерн Юнион гүйлгээг ашиглан худалдаа хийхдээ бараа бүтээгдэхүүний төлбөрөө  урьдчилан шилжүүлэхгүй байх;
• Үл таних гадаад, дотоодын иргэнд Вестерн Юнион гүйлгээг ашиглан шилжүүлсэн гүйлгээний баримт, мөнгө хүлээн авах нууц асуулт, хариултаа мэдээлэхгүй, өгөхгүй байх;
• Хуурамч веб сайт руу мөнгө хүлээн авах нууц асуулт, хариулт зэрэг холбогдох мэдээлэлүүдээ оруулж шалгахгүй байхыг зөвлөж, сэрэмжлүүлж байна.