Энэ жил Селтикийн бүрэлдэхүүнд гайхалтай тоглож, европийн тэр дундаа Английн клубуудын сонирхлыг татаад байсан хагас хамгаалагч Виктор Ванямаг, Английн прьемер лигийн аварга болох нь тодорхой болсон Манчестер Юнайтедынхан сонирхож эхэлжээ. 2012 оны 11 дүгээр сарын эхээр аваргуудын лигийн хэсгийн тоглолтод “Селтик” клуб Испанийн “Барселона” клубтэй таарч 2:1-ийн харьцаагаар хожиход Ваняма чухал үүрэг гүйцэтгэсэн билээ. Энэ тоглолтоос хойш түүнийг европын шилдэг клубууд сонирхож эхэлсэн юм. Селтикийн 21 настай хагас хамгаалагч энэ жил Шотландын лигт шилдэг тоглолт үзүүлж улирлын шилдэг залуу тоглогчийн шагналыг хүртээд байгаа аж. “Би энэ багт үнэхээр аз жаргалтай байна. Би зүгээр л хөлбөмбөг тоглож, гайхалтай мэдрэмжийг мэдрэхийг хүсдэг. Надад европийн шилдэг баг санал тавьсанд үнэхээр баяртай байна. Гэхдээ би алдарт хүрэхийн тулд яарахгүй байгаа. Учир нь Селтик бол агуу. Надад клубын дасгалжуулагч итгэж боломж олгосон. Би яг одоо зөв клубт тоглож байгаа” гэж Селтикийн хагас хамгаалагч Ваняма ярьжээ. Нигери гаралтай тоглогч Ваняма Шотландын “Селтик” багтай 2015 он хүртэл гэрээ байгуулсан аж. Улаан чөтгөрүүдийн менежер Сир Алекс Фергюсон түүнийг ирэх намар гэхэд гарааны бүрэлдэхүүндээ багтаахыг хүсч байгаа юм.