Хөдөлмөрийн сайд Я.Санжмятав хөдөлмөр эрхлэлтийг дэмжих ажлын хүрээнд ахмад настнуудын хөдөлмөр эрхлэлтийг дэмжих зорилготой “Мэргэжлийн зөвлөх баг ажиллуулах хөтөлбөр”-ийг санаачилсан. Тэгвэл энэ санаачлагыг дэмжиж буйгаа илэрхийлэн “Таны зүтгэлийн төлөө” ТББ-аас “Ахмадын сургааль алт” анхдугаар хуралдайг маргааш Төмөр замын соёлын ордонд зохион байгуулах болжээ. Хуралдайд нийслэлийн дүүрэг хороо бүрээс ахмадуудын төлөөлөл оролцох бөгөөд Хөдөлмөрийн яам, Хүн ам хөгжлийн нийгмийн хамгааллын яам, Чөлөөт ахмадын холбоо, ҮХАҮТ-ын дэргэдэх ахмад экспертүүдийн холбооноос нийтдээ 220 хүн оролцох аж.

Өндөр боловсрол, нарийн мэргэжил эзэмшсэн, аливаа ажлыг удирдан зохион байгуулах, зааж зөвлөх, хяналт тавих, сургалт явуулах зэрэг ажлын дадлага туршлагатай ахмадуудын мэдлэг чадвар, арга барил, оюуны их нөөц боломжийг улс, аж ахуйн салбар бүрт ашиглах, өвлүүлэн үлдээх, ингэснээрээ нэг талаас тэтгэвэртээ суусан өндөр настнуудын амьдралын идэвхийг нэмэгдүүлэхэд хөтөлбөрийн зорилго оршжээ. Нөгөө талаас тэдний хуримтлуулсан туршлагыг нийгэм, улс орны шаардлагатай салбар нэгжид үр дүнтэй ашиглах зорилго бүхий тус чуулганаар  ахмад эмч, багш, хуульч, инженер, эдийн засагч, хэвлэл мэдээллийн ажилтнуудын, хөдөө аж ахуйн ахмад мэргэжилтнүүд, ахмад эрдэмтдийн гэсэн найман зөвлөх багийг зохион байгуулах юм байна. Баг бүр мэргэжлийн онцлогоос хамааран төрөлжсөн зохион байгуулалттай аж. Тухайлбал, ахмад эмч нарын баг дотроо хүүхдийн, эрүүл ахуйн, эм зүйчдийн болон бусад гэж салбарлах бол ахмад багш нарын баг их, дээд сургуулийн, ерөнхий боловсролын сургууль, цэцэрлэгийн гэх мэтээр салбарлах гэнэ.

Мэргэжлийн багт орох бүрэлдэхүүнд тухайн салбарт 30-аас доошгүй жил ажилласан, мэргэжлээрээ эрдмийн зэрэг цолтой, төрийн шагнал, гавьяат, ардын цолтой бол давуу тал болох бөгөөд тухайн салбартаа удирдах албан тушаал хашсан туршлагатай, олон нийтэд хүлээн зөвшөөрөгдсөн нэр хүндтэй зэрэг ерөнхий шаардлага тавигджээ. Мөн зөвлөх багууд дотооддоо төдийгүй гадаад улс орны урилгаар очиж зөвлөгөө өгөх чадамжтай байхаар тооцож ажиллах юм байна. Урьдчилан тооцоолсноор дээрх багуудад 6000 орчим ахмад хамрагдах боломжтой бөгөөд улсын хэмжээнд 7-8 мэргэжлээр тус бүр 10 гишүүнтэй багт 70-80 ахмад, 21 аймгийн хэмжээнд зөвлөх багт 1500 орчим, хорооны хэмжээнд зөвлөх багуудад 450, сум хороодод 4500 гаруй ахмадууд ажиллах боломжтой гэнэ.