УЕФА-гийн Аваргуудын лигийн тэмцээний хагас шигшээ шатны эхний тоглолтууд хэний ч таамаглаагүй үр дүнгээр өндөрлөлөө. Товчхондоо бол Германы багууд Испанийн “Аварга загасууд”-ыг 8:1-ийн харьцаатай “бут ниргэлээ”. Аваргуудын лигийн шөвгийн дөрвөн багийн сугалааны дараа Испанийн “Эл класико” Германы “Бундестийм”-ийн эсрэг тоглохоор боллоо. Шигшээ тоглолтод “Эл класико” юу, “Бундестийм” үү гэсэн асуу . Хагас шигшээн эхний тоглолтуудаас харахад 2012-2013 оны “Аваргуудын лиг”-ийн Германы багууд тоглох магадлал хамгийн өндөр харагдаж байна. Харин хагас шигшээ тоглолтын өмнө “Аваргуудын лиг”-т Испанийн эзэн хааны гэгддэг “Реал Мадрид”, Испанийн Каталон үндэстний бахархал “Барселона”, Баруун Германы “Байерн Мюнхен” багуудын нэг нь түрүүлнэ гэж таамаглаж байсан. Харин “Боруссия Дортмунд”-ын залууст томоохон тэмцээний туршлага дутна. “Аваргуудын лиг”-ийн цомыг 11 жил хүлээсэн “Реал Мадрид” багийг хожихгүй гэж үзэж байв.

Сүүлийн 12 жил Германы багт хожигдоогүй гэсэн амжилттайгаар “Аваргуудын лиг”-ийн хагас шигшээд “Байерн Мюнхен”-ий талбайд зочилсон “Барса” 4:0-ийн харьцаатай хожигдсон юм. “Барса”-гийн 12 жил хожигдоогүй цуврал зогссон төдийгүй “Аваргуудын лиг”-ийн шигшээ тоглолтод шалгарах найдвар нь багассан юм. 

Тоглолтын дараа хэвлэлийн бага хурал дээр “Барселона” багийн дэд ахлагч Шави:

-Энэ тоглолтыг бид хамгийн муу үр дүнтэй дуусгалаа. “Байерн” талбайдаа биднээс илүү тоглосныг хүлээн зөвшөөрч байна. Ийм олон гоолын зөрүүтэй хожигдлын дараа “Аваргуудын лиг”-ийн шигшээ тоглолтод шалгарна гэдэг боломжгүй зүйл. Гэхдээ “Барса” “Камп ноу” цэнгэлдэхдээ 98 мянган хөгжөөн дэмжигчийнхээ өмнө боломжгүй зүйлийг хийхийн төлөө тоглоод үзнэ” гэж ярьсан юм.

Энэ тоглолтод “Барса” хангалтгүй тоглосноос гадна торгуулийн талбайд дөрвөн удаа бөмбөгт гар хүрсэн нь удаашруулсан бичлэгээс харагдсан юм. Харин энэ үйлдлүүдэд шүүгчид торгуулийн цохилт өгөөгүйд “Байерн Мюнхен” багийнхан сэтгэл дундуур хоцорсон. Гэхдээ “Байерн” багийн дөрвөн гоолын гурав нь “асуудалтай” орсон. Эхний гоолын дамжуулалтыг өгөхдөө Данте хамгаалагч дээр дарж үсэрсэн, хоёр дахь гоол отон тоглолтын байрлалаас, гурав дахь нь Томас Мюллер хамгаалагч дээр алдаа гаргасан нь харагдсан. Нэг ёсондоо хоёр багийн алдаа, оноо тэнцсэн гэхэд болно.  Хариу тоглолт “Камп ноу” цэнгэлдэхэд болно. Энэ цэнгэлдэхдээ “Барса” “Байерн” багийг онд 4:0-ийн харьцаатай хожиж байсан юм. Мөн “Барса” шөвгийн дөрөвт Италийн “АС Милан” багийг 4:0-ийн харьцаатай буулган авсан. Энэ мэт эргэн ирэлтийг “Барса”-гийн хөгжөөн дэмжигчид хүлээж буй. Гэвч Германы “төгс машин” “Байерн”-ыг дөрвөөс дээш гоолын зөрүүтэй хожно гэдэг амаргүй. “Барса” “Байерн” багуудын шийдвэрлэх тоглолт тавдугаар сарын 2-нд Испанийн Барселона хотын 98 мянган хөгжөөн дэмжигчийн багтаамжтай “Камп ноу” цэнгэлдэхэд болно.

Сүүлийн 11 жилийн турш Германы багийг хожоогүй Испанийн эзэн хааны “Реал Мадрид” “Боруссия Дортмунд”-ын талбайд зочлон, 4:1-ийн харьцаатай хожигдлоо. “Реал” мөнхийн өрсөлдөгч “Барса”-гаа бодвол Германы багийн талбайд нэр төрийн нэг гоол оруулж амжлаа. Өнгөрсөн шөнийн тоглолтод польш довтлогч Роберт Левандовски дөрвөн гоолоор “покер” хийсэн юм. Ингэснээр Левандовски “Аваргуудын лиг”-ийн тэмцээнд “Реал Мадрид” багийн хаалганд нэг тоглолтод дөрвөн гоол оруулсан цорын ганц тоглогч болов.  Мөн “Онцгой нэгэн” Жозе Моуриньо “Аваргуудын лиг”-ийн 106 тоглолтод хамгийн олон гоолын зөрүүтэй хожигдсон нь “Боруссия Дортмунд”-ын “Сигнал Идуна” цэнгэлдэхэд боллоо.

Тоглолтын дараа хэвлэлийн бага хурал дээр “Реал”-ын дасгалжуулагч Жозе Моуриньо:

-Энэ тоглолтод илүү тоглосон баг нь хожлоо. “Дортмунд”-ын багийн тоглолт, цэнгэлдэхийн уур амьсгал гайхалтай юм. Тэд эхэлж гоол оруулсан нь давуу тал боллоо гэжээ.

Харин “Левандовски “Реал”-ын хаалганд дөрвөн гоол орууллаа. Тэгэхээр ирэх зун танай баг Роберт Левандовскийг худалдаж авах уу” гэсэн сэтгүүлчийн асуултад “Багийн ерөнхийлөгч Флорентина Пересээс асуу” гэж хариулсан байна.

Харин “Дортмунд”-ын дасгалжуулагч Юрген Клопп:

-Мэдээж Европийн хамгийн агуу багийг буулган авсан нь гайхалтай хэрэг. Бид тоглолтын эхний хагаст олдсон боломжуудаа бүрэн ашиглаж чадаагүй. Харин хоёрдугаар хагаст үнэхээр сэтгэл хөдлөм тоглолоо. Хариу тоглолт маш хүнд болно гэж хэлсэн байна.

Мөн “Реал Мадрид” багийн хамгаалагч Серхио Рамос:

-Бид эхний тоглолтод үнэхээр хангалтгүй тоглолоо. Магадгүй хариу тоглолтод ч бэлэн биш байна. Талбай дээрээ сайн тоглох хэрэгтэй байна гэжээ.

“Реал” болон “Дортмунд” багийн шийдвэрлэх хариу тоглолт тавдугаар сарын 1-нд шөнийн 02:45 цагаас Испанийн нийслэл Мадрид хотын “Сантьяго Бернабау” цэнгэлдэхэд болно.

Ийнхүү дөрвөн багийн тоглолт 8:1-ийн харьцаатай Германы багуудын илт давамгайллаар өндөрлөлөө. Харин энэ улирлын “Аваргуудын лиг”-ийн шигшээд тоглолтод ямар багууд шалгарах нь тавдугаарын 2-ны өглөөний 06:00 цаг гэхэд тодорсон байх учиртай.