Амьд хөгжим сонирхогч залуус, тэр дундаа “Никитон” хамтлагийн үнэнч фенүүдийн удтал хүлээсэн “Үүлэн үст” өнөөдөр “iLoft Function Нouse”-д албан ёсоор нээлтээ хийн худалдаанд гарлаа. “Никитон” хамтлагийн зургаан жил хүлээлгэсэн “Үүлэн үст” цомог нь “Тайз”, “Ахыгаа дэлхий дээр буулгаад аль”, “Шуурга”, “Baby”, “Зэмсэг”, “Үүлэн үст”, “Нар”, “Яагаа ч үгүй”, “Терминаль 12”, “Баяртай терминаль 12” хэмээх арван дуунаас бүрджээ. Цомгийн ерөнхий ивээн тэтгэгчээр “Алтан тариа” компани ажилласан бөгөөд хоолойн бичлэгийг Н.Баярхүүгийн “White Arch”, микс мастерингийг АНУ-ын “Right angle” студидэд хийлгэжээ.

Шинэ цомгийн дууны хөгжмийг “Никитон” хамтлагийн ахлагч, Урлагийн гавьяат зүтгэлтэн, дуучин Б.Батчулуун зохион төгөлдөр хуураас гадна хийл, альт хийл, морин хийлийн тансаг аялгууг шингээж өгснөөрөө шинэ мэдрэмжээр таныг хөглөх нь ээ. “Үүлэн үст” цомгийн дууны шүлгүүдийг Г.Сэр-Одын нэрэмжит шагналт яруу найрагч О.Цэнд-Аюуш, “Нисванис” хамтлагийн ахлагч Л.Энх-Амгалан, дуучин П.Хэрлэн нар зохиожээ. Цомгийн дизайн болон “Үүлэн үст” дууны клипийг “On’n & Off” продакшн хийсэн байна.

Маш олон хүний сэтгэл, хүч хөдөлмөрийн үр дүнд бүтсэн “Үүлэн үст” клипийн нээлтийг өнөөдөр цомгийн баяр дээрээ албан ёсоор үзэгчдийн хүртээл болгосон юм. 

“Үүлийг үсийг чинь гэж боддог

Цасыг царайг чинь гэж боддог

Салхийг уруулыг чинь гэж боддог

Сарыг гунигийг чинь гэж боддог

Салхин уруултай, саран гунигтай…” хэмээх “Үүлэн үст” дууны шүлгийг Г.Сэр-Одын нэрэмжит шагналт яруу найрагч О.Цэнд-Аюуш бичин Бачка хөгжмийг нь зохиожээ. Орчлон ерөнцийг гоо үзэсгэлэнгээрээ чимж буй бүх бүсгүйчүүддээ “Никитон” хамтлагийн зүгээс барьж буй “Үүлэн үст” таны сонорт ийнхүү хүрлээ.

“On’n & Off” продакшны бүтээсэн “Үүлэн үст” дууны клип нь учрах тавилантай хосууд гэдэг аль ч цаг үед төөрөг тавилангаараа учирдаг гэдгийг харуулахыг зорьсон аж. Есөн минутын турш үргэлжлэх энэ клипэнд 1900, 1930, 1970 он болон орчин үе гэсэн дөрвөн үеийн төлөөлөл болсон залуусын хайр дурлалыг жүжигчин Бэкэ, Цэцэгээ, СУИС-ын оюутан Мишээл, гитарчин, дууны найруулагч Мөнх-Оргил нар клипнээ амьдруулжээ.

“Никитон” хамтлагийн дуучин, Урлагийн гавьяат зүтгэлтэн Б.Батчулуун “Үүлэн үст” цомгийн уран бүтээлүүдээ олон нийтэд түгээх онцгой эрхээ “Боловсрол суваг” телевизэд өгч, оюуны өмчийн эрхийг хамгаалах “Үүлэн үст” төслийг хэрэгжүүлэхээр хоёр талууд хамтын ажиллагааны гэрээнд гарын үсэг зуран солилцсон юм. Уг төслийн хүрээнд “Үүлэн үст” клипийг бүрэн эхээр нь нийтэд цацах эрхийг одоогоор албан ёсоор “Боловсрол суваг” телевиз худалдан аваад байгаа юм. Түүнчлэн төслийн хүрээнд цомгийн дуунууд, клип, клип хэрхэн бүтсэн түүх, “Никитон” хамтлагийн дуучин, Урлагийн гавьяат зүтгэлтэн Б.Батчулууны тухай өгүүлэх “Энэ миний түүх” баримтат кино, нэвтрүүлэг, дуучинтай хийх цуврал ярилцлага, фенүүдтэйгээ хийх “Unplugged” нэвтрүүлгүүд зөвхөн “Боловсрол суваг” телевизийн үзэгчдэд хүрэх нь ээ.

“Үүлэн үст” цомгийн үнэ 55 мянган төгрөг бөгөөд 1950 тусгай дугаарт захиалан үнэгүй хүргүүлж аваарай. 

Г.ДАША