Европийн хөлбөмбөгийн холбоо /UEFA/-ны Аваргуудын лигийн хагас шигшээд сугалаа таарсан Германы “Байерн Мюнхен” болон Испанийн Каталон үндэстний бахархал “Барселона” багууд өнөө шөнө 02:45 цагт /Улаанбаатарын цагаар/ тоглоно. Хагас шигшээ шатны эхний тоглолт Германы Бавари мужийн “Байерн” багийн 68 мянган хөгжөөн дэмжигчийн багтаамжтай “Альянз Арена” цэнгэлдэхэд болох юм. Сүүлийн жилүүдэд Аваргуудын лигт тогтмол дээгүүр амжилт үзүүлж буй энэ хоёр багийн тоглолтод Германы “Байерн Мюнхен” ялах магадлалтай гэсэн таамгийг хөлбөмбөгийн нэртэй тоймчид, сэтгүүлчид дэвшүүлжээ. Аваргуудын лигийн тэмцээнд тус тус дөрвөнтөө түрүүлсэн хоёр багийн тоглолтыг “Дархан аваргууд”-ын тулаан гэж нэрлэхэд буруудахгүй биз ээ.

Тоглолтын өмнө хоёр багтай холбоотой зарим мэдээллийг сонирхуулъя.

Талбайн эзэн “Байерн Мюнхен”

1. “Байерн” Европийн хөлбөмбөгийн холбооны цомын тэмцээнд дөрвөн удаа түрүүлжээ. 1974-1976 онд алдарт Франц Бекенбауерийн үед гурван удаа, хамгийн сүүлд 2001 онд Аваргуудын лигийн тэмцээнд түрүүлсэн байна.
2. “Байерн” Германы хамгийн агуу баг юм. Тэд Германы “Бундеслиг”-т 23, лигийн цомын тэмцээнд 15, “Аваргуудын лиг”-ийн тэмцээнд дөрвөн удаа түрүүлжээ. 
3. “Байерн” Германы хамгийн агуу цэнгэлдэхүүдийн нэг “Альянз Арена”-даа өнөө шөнө тоглоно. Хамгийн сүүлийн үеийн загвартайгаараа алдартай “Альянз Арена” цэнгэлдэх 68 мянган хүний багтаамжтай. Энэ цэнгэлдэхийг 2005 онд засварласны дараа хөлбөмбөгийн ДАШТ-ийг хүлээн авсан билээ. 
4. “Байерн” энэ жил хамгийн эрт Бундеслигийн аварга болж, дээд амжилт тогтоосон. Тэд зургаан тойргийн өмнө Германы дээд лигийн аваргаар тодорсон. Тиймээс бүхий л анхаарлаа Аваргуудын лигт хандуулж, шилдэг тоглогчдоо хангалттай амрааж амжжээ. 
5. Өнөө шөнийн тоглолтод хагас хамгаалагч Тони Кроос болон хамгаалагч Холгер Бадштютер бэртлийн улмаас оролцохгүй. Мөн “Байерн” багийн гол довтлогч Марио Манзукич хоёр дахь шар хуудасны улмаас өнөө шөнийн тоглолтыг өнжинө. Гэхдээ хүчирхэг бүрэлдэхүүнтэй “Байерн”-д энэ асуудал биш. 
6. “Байерн” 2001 оноос хойш Аваргуудын лигийн тэмцээнд түрүүлээгүй юм. Өнгөрсөн 12 жилийн хугацаанд “Байерн” хоёр удаа шигшээд тоглосон ч түрүүлж чадаагүй. Тэгэхээр Германы “төгс машинууд” Аваргуудын лигийн цомоор “цангаж” яваа нь гарцаагүй. 
7. “Байерн” болон “Барса” багууд Аваргуудын лигт хамгийн сүүлд 2009 оны улиралд учраа таарчээ. Тухайн жил “Барса” зогсоошгүй хүчирхэг байж, оролцсон зургаан тэмцээндээ түрүүлсэн билээ. Тус тоглолт “Байерн” “Барса”-гийн талбайд 4:0-ийн харьцаатай хожигдож, талбайдаа 1:1-ийн харьцаатай тэнцсэн билээ. 
8. Мөн 2009 оны зургаан сарын 24-нд хоёр баг тохиролцон, хандивын тоглолт хийсэн юм. Тухайн зун “Баейрн” багийн ерөнхийлөгч Ули Хоенессийн нэрэмжит цомын тэмцээнд нөхөрсөг тоглолт хийж байсан юм. 
9. “Байерн” багийн дараагийн дасгалжуулагч Пеп Гвардиола болно. Пеп “Барса”-г 2009-2012 оны хооронд удирдаж, авч болон 19 цомын 14-ийг хүртэж байв.  

Харин “Барселона” Аваргуудын лигийн тэмцээнд Германд хэрхэн тоглосныг үзье.

Зочин баг “Барселона” /Барса/

• 2011-2012 онд Байер Ливеркүзен 1-3 Барселона /Шөвгийн 16/
• 2009-2010 онд Штутгарт 1-1 Барселона /Шөвгийн 16/
• 2008-2009 онд Байерн Мюнхен 1-1 Барселона /Шөвгийн 8/
• 2007-2008 онд Шальке 04 0-1 Барселона /Шөвгийн 4-ийн төлөө/
• 2007-2008 онд Штутгарт 0-2 Барселона /Хэсгийн тоглолт/
• 2006-2007 онд Вердер Бремен 1-1 Барселона /Хэсгийн тоглолт/
• 2005-2006 онд Вердер Бремен 0-2 Барселона /Хэсгийн тоглолт/
• 2002-2003 онд Байер Ливеркүзен 1-2 Барселона

Дээрх үр дүнгээс харвал, Испанийн Каталоны нэр төр “Барселона” Германд зочилсон найман тоглолтдоо таван удаа хожиж, гурван удаа тэнцсэн байна. “Барселона” Германы багуудад сүүлийн 11 жилийн турш “Аваргуудын лигийн тэмцээнд хожигдоогүй юм. Тэд хамгийн сүүлд 2001-2001 онд “Байер Ливеркүзен” багт 2:1-ийн харьцаатай хожигджээ. Түүнээс хойш “Барса” Германы багуудыг 14 хожиж, гурван удаа тэнцсэн гэсэн амжилттайгаар өнөө шөнийн тоглолтод оролцох гэж байна.

Харин “Барса” Аваргуудын лигийн тэмцээнд “Байерн Мюнхен” багтай 1995-1996, 2008-2009 онд тэнцээгээр өндөрлөсөн байна. Харин 1998-1999 онд хэсгийн тоглолтод “Баейрн” “Барса”-г буулган авчээ. Тухайн жил “Байерн” Аваргуудын лигийн шигшээ тоглолтод Английн “Ман Ю”-д хожигдсон юм. Тоглолтын зургаа дахь минутаас эхлэн 1:0-ийн харьцаатай тэргүүлсэн “Байерн” шүүгчийн мэдлийн 90+1, 90+2 минутад гоол алдсан гашуун түүхтэй. 

Аваргуудын шөвгийн дөрвийн нөгөө учраа болох “Реал Мадрид” болон “Боруссия Дортмунд” багийн тоглолт маргааш Германд болох юм.