УИХ-ын Ёс зүйн дэд хорооны хуралдаан дөнгөж сая хаалттай горимд шилжлээ. Эл дэд хорооны хуралдаанаар УИХ-ын гишүүн Д.Батцогт нарын долоон гишүүнээс ирүүлсэн С.Баярцогт гишүүнийг Ёс зүйн дэд хороогоор хэлэлцэх ёстой гэсэн саналыг хэлэлцэхтэй холбогдуулж ийн хаалттай хуралдаж буй юм. Уг нь дэд хороо аливаа асуудлыг нээлттэй хэлэлцэж болно. Гэхдээ энэ удаад УИХ-ын гишүүн Д.Эрдэнэбат “Асуудлыг олон талаас нь ярилцах ёстой болох байх. Зөв мэдээлэл авах зайлшгүй шаардлага гарна. Тиймээс хуралдааныг хаалттай горимд шилжүүлэх хүсэлтэй байна” гэсэн горимын санал гаргасан юм. Эл саналыг байнгын хорооны хуралдаанд оролцож буй гишүүдээс зургаа нь дэмжсэн тул ийнхүү хуралдаан хаалттай горимд шилжлээ.

Ёс зүйн дэд хорооны хуралдаанд тус дэд хорооны дарга УИХ-ын гишүүн М.Батчимэг, УИХ-ын гишүүн Ш.Түвдэндорж, Ж.Батзандан, З.Баянсэлэнгэ, Д.Тэрбишдагва, Д.Эрдэнэбат, М.Наранхүү, С.Баярцогт нар оролцож байна.