“UBRM консалтинг” ХХК-аас санаачлан Оксфорд
бизнес групп, Оюутолгойн санхүүгийн дэмжлэгтэйгээр “Монгол Улс дахь гадаадын хөрөнгө
оруулалт-эрсдэл, сорилт, шийдвэрлэх арга зам” сэдэвт эрдэм шинжилгээний бага хурал зохион байгууллаа. Эдийн засгийн чиглэлийн бүхий л лидерүүдийг хөрөнгө оруулагчдын хамт цуглуулсан энэхү эрдэм
шинжилгээний бага хурал нь УИХ-ын чуулганаар “Стратегийн ач холбогдол бүхий аж ахуйн
нэгжид гадаадын хөрөнгө оруулалтыг зохицуулах тухай хууль”-д оруулах
нэмэлт өөрчлөлтийг
хэлэлцэх үетэй цаг хугацааны хувьд давхцаж таарсан юм. Хөрөнгө оруулалтыг
царцанги байдалд оруулсан гол “буруутан” болсон дээрх хуульд нэмэлт өөрчлөлт оруулсан
талаарх баяртай мэдээг дуулгасан хүн нь ЭЗХЯ-ны Гадаадын хөрөнгө оруулалтын зохицуулалт бүртгэлийн
газрын дарга С.Жавхланбаатар байлаа. Зөвхөн хуулийн өөрчлөлтийг батлаад зогсохгүй хууль
хэрэгжүүлэх журмыг мөн баталсан нь гадаадын хөрөнгө оруулалтыг
гацаанаас гаргаж, сүүлийн хагас жилд эдийн засаг сэргэх үндсийг тавьж
байна гэж тэрбээр тодотгосон.
Хурлын үеэр гадаадын хөрөнгө оруулалт өнгөрсөн
хугацаанд ямар байсныг 2003 оноос хойшхи зураглалаар хэлэлцсэний дээр Монгол
Улсын геополитекийн орон зайн талаар ч хөндсөн юм. Эдийн засгийг галт тэргээр зүйрлэвэл гадаадын хөрөнгө оруулалт өнгөрсөн хугацаанд зүтгэх депо
болж ирсэн. Арваад жилийн өмнө манай төр засгийн
удирдлагууд гадаад улс оронд зочлох, гадны зочдыг урих бүртээ хөрөнгө оруулахыг
уриалж, гуйдаг байсан бол өдгөө хөрөнгө оруулалтыг дэмжихийн дээр зохицуулах талаар ярих хэмжээнд хүрсэн нь том
амжилт гэдгийг эрдэмтэн,
судлаачид онцолж байв. Харин эдийн засгийн оргил үе 2011 оноос
буурсан нь ганц дотоодын хүчин зүйлээс гадна
дэлхийн улс орнуудын эдийн засгийн байдал, тэр дундаа БНХАУ-ын улстөрийн өөрчлөлтөөс хамаарсан гэдэгтэй санал нэгдэв.
Дэлхий
нийтийн хэмжээнд гадаадын хөрөнгө оруулалт буурсны дээр бүс нутгийн
хэмжээнд 18 хувийн бууралттай байгаа хөрөнгө оруулалт энэ
оны сүүлийн хагаст өсөн нэмэгдэж, эдийн засагт эерэг нөлөө үзүүлнэ гэсэн өөдрөг дүгнэлтийг эдийн засагчид хэлж байна.
Д.ЦЭЭНЭ