УИХ-ын чуулганы өнөөдрийн үдээс хойших нэгдсэн хуралдаанаар эрхэм гишүүн С.Бямбацогтын Боловсрол, соёл, шинжлэх ухааны сайдад тавьсан "Монгол хөөмийн дуулах урлагийг хамгаалах, хөгжүүлэх талаар хэрэгжүүлж буй бодлого, уг асуудлаар үүсээд байгаа нөхцөл, байдлыг хэрхэн шийдвэрлэж байгаа талаарх асуулгын хариуг сонслоо. Энэ үеэр гишүүд мөн түүхийн дурсгалт зүйлс, археологийн олдворуудын хадгалалт, хамгаалалтын талаар сонирхож байсан юм.

Монгол хөөмийг БНХАУ нэр дээрээ ЮНЕСКО-д бүртгүүлснийг гишүүд манай талын анзааргагүй, хайнгаас болсон хэмээж байв. Гэвч хил залгаа, нэг угсааны хүмүүс тархан суурьшсан орнууд өөр өөрийн нэр дээр соёлын өвийг бүртгүүлж болох талаар ЮНЕСКО-гоос мэдэгдэж байжээ. Д.Арвин гишүүн ЮНЕСКО-д захидал илгээж соёлын өвийг бүртгэхдээ болгоомжтой хандах, үүнээс болж улс орнуудын хооронд зөрчил үүсгэж болох талаар санал тавихыг сайд Ё.Отгонбаярт хэлж байлаа. Зөрчил нь зэвсэгт мөргөлдөөнд ч хүргэж байсан жишээ бий аж. Манай талаас захидал илгээж ЮНЕСКО-гийн даргатай ч биечлэн уулзаж ярилцсан талаараа сайд хэллээ.

Д.ОЮУН