УИХ-ын чуулганы нэгдсэн хуралдаан үргэлжилж байна. Хуралдаанаар УИХ-ын гишүүн С.Баярцогтыг УИХ-ын дэд даргаас чөлөөлөх тухай асуудлыг хэлэлцэж буй юм. Энэ хүрээнд УИХ-ын гишүүн Ж.Энхбаяр “С.Баярцогтын асуудлыг УИХ-ын Ёс зүйн дэд хороогоор хэлэлцээд санал дүгнэлт гарган олон нийтэд мэдээлэх үүрэгтэй. Энэ талаар Ёс зүйн дэд хороо юу хийв. Сонирхлын зөрчлийн хуулийн хүрээнд С.Баярцогт гишүүнийг УИХ-ын гишүүнээс нь чөлөөлөх боломжтой юу” гэлээ.

УИХ-ын Ёс зүйн дэд хорооны дарга М.Батчимэг “УИХ-ын гишүүнийх нь хувьд Ёс зүйн дэд хороогоор авч үзэх асуудал үргэлжилнэ” гэсэн хариулт өгсөн бол УИХ-ын гишүүн, Хууль зүйн сайд Х.Тэмүүжин “Өмнөх парламентаар Сонирхлын зөрчлийг зохицуулах тухай хуулийг хэлэлцэх шатанд УИХ-ын гишүүнийг эргүүлэн татахтай холбоотой заалтыг үндсэнд нь тэр үеийн олонхийн бүлгийн гишүүд авсан. Хуулиа батлуулахын тулд тэгэхээс өөр арга байгаагүй. Дээр нь Үндсэн хуулийн цэцээс УИХ-ын гишүүн нь гэмт хэргийн үйлдэл дээрээ баригдсан бол УИХ-ын гишүүнийх нь бүрэн эрхээс түдгэлзүүлэх асуудлыг тавьж болно гэсэн. Тиймээс С.Баярцогтыг УИХ-ын гишүүнийх нь бүрэн эрхийг түдгэлзүүлэх боломж хязгаарлагдмал” гэлээ.