Венесуэль улсын хүчирхэг удирдагч, латин Америкийн бэл­гэ тэмдэг болсон Уго Чавезийг хорт хавдраар нас барснаас хойш “Түүнийг хэн залгамжлах вэ” гэсэн асуулт дэлхий нийтийн өмнө тулгарсан. Энэ асуултад хүн бүр өөрийн үзэл бодлыг илэрхийлсэн боловч олон нийтийн санал асуул­гаар “Түүн шиг хүн Венесуэльд дахин төрөхгүй. Харин түүний үйл хэр­гийг цааш үргэлжлүүлэх хүнийг бид сонгох ёстой” гэсэн хариулт бий болсон.

Өнгөрсөн долоо хоногийн ням гарагт Венесуэль улсын Ерөн­хий­лөгчийн сонгууль болов. Уг нь талийгаачийг амьд сэрүүн бай­хад буюу өнгөрсөн оны арван­нэгдүгээр сард тус улсын ээл­жит сонгуульд дөрвөн хувийн саналын зөрүүтэй Уго Чавез ялалт бай­гуулж байв. Гэвч өнгөрсөн сарын 5-ны өдөр хорт хавдрын улмаас тэр­бээр нас барсан юм. Тус улсын албаныхан яаралтай дараагийн Ерөн­хийлөгчийг сонгох ёстой гэх үүд­нээс дөрөвдүгээр сард багтаан ээлжит бус сонгууль явуулах санал дээр нэгдсэн билээ.

Венесуэлийн Ерөнхийлөгчийн сонгуульд Уго Чавезийн бодлогыг дэмждэг Николас Мадуро, сөрөг хүчний тэргүүн туршлагатай улс­төрч Энрике Капхилес нар нэр дэвшсэн. Яг энэ тохиолдолд санал өгч буй иргэд “Хэнд нь итгэл хүлээлгэх талаар сайн мэдэхгүй, эргэлзээтэй байсан” талаар хэв­лэлүүд онцолсон юм. Сонгууль болохоос яг нэг өдрийн өмнө буюу энэ сарын 13-ны өдөр нь  У.Чавезыг төрийн өндөрлөгөөс түлхэн уна­гах гэсэн империалистуудын оролд­лого бүтэлгүйтсэн түүхэн өдөр.Нөгөө талаасаа Н.Мадуро Ерөн­хийлөгч асан У.Чавесын шарилд хүндэтгэл үзүүлж, түүнийгээ үндэс­ний телевизээр шууд дам­жуулсан нь “Сонгуулийн сурталчилгаа боллоо” хэмээн сөрөг хүчин Энрике Капхилес эсэргүүцсэн. Тус улсын хуулинд сонгуулийн санал хураалт эхлэхээс өмнө буюу 24 цагийн өмнө сурталчилгааны ажил бүрэн зогссон байх ёстой аж.

Санал хураалт У.Чавезийн нам болох Социалист намаас нэр дэвшсэн Николас Мадурогийн ялал­таар өндөрлөсөн талаар эх сур­валжууд мэдээлсэн. Түүнийг албан ёсоор Венесуэль улсын Ерөн­хийлөгчөөр томилох тухай тус улсын дээд албаныхан мэдэгдэж, шинэ Ерөн­хийлөгчийг хүлээн авах ажлыг хийж эхэллээ. Николас Мадуро У.Чавезийг нас барсны дараа яагаад Ерөнхийлөгчийн байр суурийг түр эзэлсэн нь сонгуулийн үр дүн баталсан. Гэхдээ санал хураалт тун өрсөлдөөнттэй болсон юм. Мадуро 50.7 хувийн санал авсан бол ардчилсан үзэлтэй өрсөл­дөгч Э.Каприлес 49.1 хувийн санал авсан аж. Сонгуулийн урьдчилсан шатны санал тоолох явцад “Мадуро ялалт байгуулах нь тодорхой боллоо. Саналын илүүтэй явж бай­на” хэмээн ард түмэнд, дэлхий ний­тэд мессеж өгсөн. Улмаар сон­гуу­лийн дүн тодорхой болсны дараа Мадуро ард түмэндээ хандан мэндчилгээ дэвшүүлж, цаашид улсынхаа үлгэр дууриалал болсон сайн Ерөнхийлөгч байхаа амласан юм. Мөн тэрбээр өрсөлдөгч Э.Каприлест хандан “Баяр хүргье. Үнэ-хээр хүчтэй өрсөлдөгч байлаа. Цаашдын ажил хөдөлмөрт амжилт хүсье” хэмээн түүнийг хүндэлж ёсолсон аж. Жирийн нэг автобусны жолооч байсан гэх Мадуро ийнхүү улсынхаа Ерөнхийлөгч болж бай­гаад хэн ч гайхахгүй байгаа бололтой.

Харин Ардчилсан намынхан дээрх саналын дүнг хүлээн зөвшөөрөхгүй, Венесуэлийн сонгуулийн саналыг дахин тоолохоор болсон. Ардчилсан үзэлтэй Э.Каприлес санал хураалтын дүн дэндүү бага зөрөөтэй байгаагаас үүдэн сон­гуулийн санал хураалтанд эргэлзэж буйгаа илэрхийлсэн юм. Үүнээс болж сонгуулийн дүнг эсэргүүцсэн жагсаал хоёр өдрийн турш үр­гэлжилж 14 хүн амиа алдаад бай­гаа харамсалтай үйл явдал болов.  Саналын хуудсыг дахин тоолох, Э.Каприлесийн төлөө хэдэн хүн санал өгснийг бодитойгоор олон нийтэд дэлгэхийг Ардчилсан намаас шаардсан юм. Олон нийтийг хамарсан эсэргүүцлийн жагсаалын үеэр Венесуэль улсын цагдаа, цэргийн бие бүрэлдэхүүн яаралтай арга хэмжээ авч, жагсаалыг тараах гэж оролдсон боловч нийгэмд эмх замбараагүй байдал хэд хэдэн удаа гарсан талаар CNN агентлаг мэдээлсэн.

Хамгийн хачирхалтай нь жаг­саал цуглаан болж өнгөрсөний маргааш өглөө нь нутгийн ихэнх газруудад бороо орсон аж. Үүнийг “Уго Чавезийн нулимс” хэмээн нэрлэсэн хэсэг хүмүүс саналын хуудсыг дахин тоолохыг шаардсан байна. Тэд “Өглөөний бороо бол талийгаач Уго Чавезийн нулимс. Түүнийг нас барсанаас хойш манай улсад иймэрхүү төрлийн жаг­саал болоогүй. Өмнө нь ч болж байгаагүй. Энэ бол тэнгэрийн дохио” хэмээн ярьжээ. Энэ үед Ерөн­-хийлөгчийн сонгуульд ялалт байгуулсан Николас Ма­дуро саналын хуудсыг дахин тоо­лохыг зөв­шөөрч, өөрийнхөө ялал­танд бат итгэлтэй байгаа тухайгаа илэр­хийлсэн. Тиймээс сөрөг хүчийг дэмжигчид дахин жаг­саал гар­гаагүй юм. Улмаар тус улсын сон­гуулийн хорооноос Ерөн­хий­лөгчийн сонгуулийн санал хураалтын хуудсыг дахин тоолох ажилд орсон юм. Өнгөрсөн онд бол­сон Ерөнхийлөгчийн сонгуулийн санал хураалтаар сөрөг хүчний Каприлес, Ерөнхийлөгч агсан Уго Чавестай өрсөлдөж, дөрөвхөн хувийн саналын зөрүүтэйгээр ялагдаж байсан нь өнөөдрийн санал хураалтын дүн­гээс хол зөрөхгүй гэдгийг баталж буй.

Хэрвээ Мадуро албан ёсоор тус улсын Ерөнхийлөгч болохоо баталж, бүх зүйл хууль дүрмийн дагуу болох юм бол олон услын зүгээс түүнд баяр хүргэж эхэлнэ. Эцсийн байдлаар дахин санал тоолох дүн гараагүй байгаа нь ард түмнийх нь дунд хүлээлтийг бий болгож буй. Ажиглагчид Мадурог “У.Ча­везийн хэмжээнд, түүний бодлогыг яг таг үргэлжлүүлж, ард түмний бэлгэ тэмдэг болж чадах уу” гэсэн яриаг нийгэмд тараасан. Тус улсын хэвлэлээр ч энэ талаар онцолсоор байна. Бүтэн 12 жилийн турш У.Чавезийн намтай нэгдсэн сөрөг хүчний хүмүүс намаасаа гарч дахин сөрөг хүчин байгуулах тохиолдол сүүлийн 3-4 жилд багагүй гарсан. Нөгөөтэйгүүр Мадурогийн бодлого намыг эргэн нэгтгэх, шинэ удирдагчтай болсон гэдгийг ард түмэнд ойлгуулахыг хичээж байгаа. Сөрөг хүчний нам болох Ардчилсан намынхан ч жилээс жилд хүчирхэгжиж байгаа гэдгийг болж өнгөрсөн сонгуулийн санал хураалтаас тодорхой харагдав. Олон жил Венесуэлийн ирээдүйг төлөөлж явсан эрх баригч намынхан өдрөөс өдөрт суларсаар байгааг түүх гэрчилж буй. Магадгүй Мадуро ард түмэнд нийгмийг арай нээлттэй, эрх чөлөөтэй байлгах бодлого явуулах юм бол түүнийг дэмжигчид нэмэгдэх байх. Энэ бүхэн түүний хийх үйл хэрэг, явуулж буй бод­логоос шууд хамаарна.