Хойд Солонгос өнөөдөр НҮБ-аас тус улсын эсрэг авч хэрэгжүүлж буй шинэ хориг арга хэмжээгээ цуцалж, АНУ болон Өмнөд Солонгос улсууд хамтарсан цэргийн сургуулилтаа зогсоосон нөхцөлд хэлэлцээрийн ширээний ард суухад бэлэн байна хэмээн мэдэгджээ. Энэ тухай Хойд Солонгосын Үндэсний батлан хамгаалах хороо буюу цэргийн дээд командлалаас “KCNA” агентлагаар дамжуулан мэдэгджээ. Энэхүү мэдэгдэлд  АНУ болон Өмнөд Солонгос улсуудыг Хойд Солонгостой чин сэтгэлээсээ яриа, хэлэлцээр хийхийг хүсч байгаа бол нэн тэргүүнд НҮБ-ын Аюулгүйн зөвлөлөөс тус улсын эсрэг авч хэрэгжүүлж буй хориг арга хэмжээний тогтоолыг цуцлуулах ёстой гэжээ. Түүнчлэн АНУ-ыг бүх дэлхийд хандан Хойд Солонгосын эсрэг ямар нэгэн сургуулилт хийхгүй гэдгийг зарлах хэрэгтэй хэмээн мэдэгдсэн байна.

Хойд Солонгос 2012 оны арванхоёрдугаар сард пуужин хөөргөж, өнгөрсөн хоёрдугаар сард цөмийн туршилт хийснээр НҮБ-ын шинэ хориг арга хэмжээтэй нүүр тулсан билээ. Харин Хойд Солонгос НҮБ-ын шинэ хориг арга хэмжээг эсэргүүцэн Өмнөд Солонгостой 1953 онд байгуулсан харилцан үл довтолцох гэрээнээс татгалзаж, улмаар Солонгосын хойгт дайны цэрэгжилтийн бэлэн байдал зарласан юм. Түүнчлэн Хойд Солонгос АНУ болон Өмнөд Солонгос улсуудыг хамтарсан цэргийн хээрийн сургуулилт хийж буйг эсэргүүцэн, Йонбён дахь цөмийн үйлдвэрээ сэргээж, Өмнөд хөрштэй бүхий л харилцаа холбоогоо таслан, Кесон дахь хамтарсан аж үйлдвэрийн бүсийг хаагаад байгаа билээ.

Үүний зэрэгцээ Өмнөд Солонгосын тангуулуудын зүгээс Хойд Солонгосыг цөмийн туршилт хийхээр бэлтгэж буй хэмээн мэдэгдсэнээр Япон, АНУ улсууд урьдчилан сэргийлэх арга хэмжээ боловсруулж эхэлсэн юм. Олон улсын зүгээс Хойд Солонгосыг их удирдагч агсан Ким Чен Ирийн төрсөн өдрөөр пуужин хөөргөж магадгүй хэмээн хардаж байсан ч байдал харьцангүй тайван байна.

Түүнчлэн энэ долоо хоногийн эхээр Өмнөд Солонгосын Ерөнхийлөгч Пак Кын Хе Хойд Солонгостой Кесоны аж үйлвэрийн хамтарсан цогцолборын үйл ажиллагааг сэргээх асуудлаар яриа хэлэлцээр хийх санал тавьсан боловч Өмнөдийн ард иргэдийн Ким Чен Ирийг эсэргүүцсэн үйлдлээс шалтгаалан Хойдын зүгээс тулган шаардах бичиг хариу болгон илгээсэн билээ.