УИХ-ын Хууль зүйн байнгын хорооны хуралдаанаар өнөөдөр Цагдаагийн албаны тухай хуулийн төсөл, Хууль сахиулагчийн эрх зүйн байдлын тухай хуулийн төсөл, Маршалын албаны тухай хуулийн төсөл, Мөрдөх албаны тухай хуулийн төсөл, Гэрч, хохирогчийг хамгаалах тухай хуулийн төсөл, Төлбөрийн чадваргүй яллагдагчид үзүүлэх хууль зүйн туслалцааны тухай гэсэн нэр бүхий багц зургаан хуулийн төслийн хэлэлцүүлэг хийж, үүнээс тавыг нь “Хэлэлцэх нь зүйтэй” хэмээн үзлээ.

Хэлэлцүүлэг эхлэх шатанд УИХ-ын гишүүн О.Баасанхүү “Энэ төслөөс хоёрыг нь хэлэлцээд үлдсэнийг буцаах хэрэгтэй. Дутуу, дулимаг хууль болсон байна” гэсэн бол УИХ-ын гишүүн, Хууль зүйн сайд Х.Тэмүүжин “Шинэчлэл хийх гэхээр тээг саад болдог зангаа О.Баасанхүү гишүүн та татах хэрэгтэй. Ярьдаг зүйл нь манай дарга Н.Энхбаяр гэх юм. Болих хэрэгтэй” хэмээн хариу хэлж байв. Харин хууль зүйн салбарт хийх шинэчлэлийн хүрээнд боловсруулагдсан энэхүү төслийг УИХ-ын гишүүн Р.Гончигдорж “Чамбай төсөл болсон. Мэргэжлийн хүмүүс ажилласан” хэмээн тодотгож байв.