Эрэлхийлэлийн бүтээлүүдийг дэмжих зорилготой монголын анхны андерграунд кино уралдаан өчигдрөөс эхлэн бүтээлүүдээ хүлээн авч эхэлжээ. Уралдааныг зохион байгуулагч Сонгодог болон Артхаус киног олон нийтэд түгээх, таниулах зорилго бүхий "Алтан хальс" холбоо "Нэгэн хэвийн болох төлөвтэй кино урлагт цочроо өгөх" хэмээн зорилгоо тодорхойлжээ. Уралдаанд 5-15 минут үргэлжлэх, эксперименталь, авангард хэлбэрийн бэсрэг кино өрсөлдөх боломжтой ажээ. Киноны дүрс бичлэгийн чанарыг үл харгалзан, бүтээлч сэтгэлгээ, уран сайхны эрэлхийллийг гол болгодгоороо андерграунд кино уралдаан онцлог гэнэ. Өөрөөр хэлбэл уг уралдаанд өндөр үзүүлэлттэй мэргэжлийн камер шаардлагагүй, гар утсаар бүтээсэн кино ч өрсөлдөх боломжтой юм. Бүтээлийг хүлээн авах явц бүхэлдээ цахим орчин ашиглан явагдах бөгөөд оролцогч видео бүтээлээ www.wetransfer.com цахим хуудаснаа байршуулж, өөрийн тухай мэдээлэл болон видео холбоосоо altankhalis@artfilm.mn хаяг руу илгээж бүртгүүлэх боломжтой ажээ. Уралдаанд бүртгүүлэх хугацаа ирэх зургадугаар сарын 15-нд дуусах бөгөөд үйл ажиллагааны талаар дэлгэрэнгүй мэдээлэлийг “Алтан хальс” холбооны www.artfilm.mn цахим хуудаснаа болон фэйсбүүк дэхь http://www.facebook.com/underground.mongolia хуудаснаа хандан хүлээн авах боломжтой.

Монголын анхны андерграунд кино уралдааны шагнал гардуулах ёслолын ажиллагаа ирэх зургадугаар сарын 22-нд “Улаан Гэр” галлерейд болох бөгөөд энэ үеэр шилдэг гурван бүтээлд мөнгөн шагнал хүртээх ажээ. Харин эхний таван байранд шалгарсан бүтээлийг энэ оны 10 дугаар сард зохион байгуулагдах “Улаанбаатар” Олон улсын кино наадмын хүрээнд олон нийтийн хүртээл болгох юм.