Хаврын тариалалт айсуй. Тариалангийн аж ахуйн нэгжүүд 41.1 мянган тонн буудайн үр нөөцөлсөн байна. Гэвч 13.3 мянган тонн үр дутахаар судалгаа гарчээ. Өнөөдрийн байдлаар Тариалан эрхлэлтийн санд 4706 тонн, ОБЕГ-ын улсын нөөцийн санд 4900 тонн буудайн үрийн нөөц байгаа бол тариалан эрхэлдэг аж ахуйн нэгжүүдэд 8.8 мянган тонн үр илүүдэлтэй байгаа гэнэ. Тиймээс энэ жилдээ буудайн үр хүрэлцээтэй гэж ҮХААЯ-ны газар тариалангийн бодлогыг хэрэгжүүлэх газрын мэргэжилтэн М.Ариунболд хэллээ.

Тариалан эрхлэлтийн санд хадгалж буй дотоодын буудайн нэг тонн үрийн үнийг 600 мянган төгрөг, импортын үрийн үнийг 765 мянган төгрөгөөр тогтоогоод байгаа ажээ. Үүнийг аж ахуйн нэгжүүдэд 30 хувийн урьдчилгаатайгаар зээлээр олгох ажээ. Энэ жилийн тариалангийн үйлдвэрлэлд нийт 20.3 мянган тонн дизелийн түлш зарцуулах бол зөвхөн хаврын тариалалтад 6.3 мянган тонн түлш хэрэгтэй ажээ. Тиймээс хаврын тариалалтад шаардагдах шатахууныг НИК, МТ /Магнай трейд/ ХХК-ууд 50 хувийн урьдчилгаатайгаар олгохоор болсон байна.