УИХ дахь Ардчилсан намын бүлгийн хуралдаанаар гишүүд намрын чуулганы завсарлагаанаар хийсэн ажлаа танилцуулсан байна. Мөн УИХ-ын сонгуулийн 26-р тойрог буюу СХД-ийн дахин санал хураалтын асуудлыг хэлэлцсэн байна.

Энэ удаагийн санал хураалт 22.00 цагт дуусах байсан ч 20.00 цагт хаах тухай шийдвэрийг тус тойргийн хорооноос гуравдугаар сарын 28-нд гаргажээ. Баянзүрх дүүргийн дахин санал хураалтыг Орон нутгийн сонгуультай давхцуулан нэг өдөр зохион байгуулах хүрээнд 2012 оны арваннэгдүгээр сарын 1-нд УИХ-аас тогтоол гаргасан байдаг. Тогтоолд дахин санал хураалт дуусах хугацааг 20.00 байсныг 22.00 цаг болгож өөрчлөх тухай заасан байгаа. Тиймээс 26-р тойргийн хороо яагаад ийм шийдвэр гаргасныг тогтоож, СЕХ хариуцлага тооцох ёстой гэж УИХ дахь АН-ын бүлгийн гишүүд үзжээ.

АН-ын бүлгийн дарга Д.Эрдэнэбат “Хэрэв дахин санал хураалт хүчингүй болох юм бол дахин сонгууль зохион байгуулах талаар УИХ-ын сонгуулийн тухай хуульд заасан байдаг. АН-ын гишүүд тойргийн хороог алдаатай тогтоол гаргаж, улсын мөнгө үр ашиггүй зарцуулсанд хариуцлага тооцох ёстой гэж үзэж байгаа. Сонгуулийн ерөнхий хороо энэ асуудалд анхаарал хандуулж, алдааг нь олж тогтоох байх” гэлээ.