Монголын олимпийн боксын холбооны Удирдах зөвлөл энэ сарын эхээр хуралдаж, тус холбооны шинэ удирдлагын асуудлыг ярилцсан бол өнөөдөр тус холбооны Ээлжит бус V их хурал болж, Монголын олимпийн боксын холбооны ерөнхийлөгчөөр УИХ, Засгийн газрын гишүүн Д.Бат-Эрдэнийг сонгон, албан ёсоор баталгаажуулжээ.

Лондонгийн олимпийн дараа тус холбооны ерөнхийлөгчөөр сонгогдсон УИХ-ын гишүүн О.Содбилэг өөрийн хүсэлтээр холбооны удирдлагын сонгуульт ажлаа хүлээлгэж өгсөн тул тус холбоо ийн шинээр удирдлагаа сонгож байгаа юм. Хурлаас мөн олимпийн аварга Э.Бадар-Ууганыг холбооны Тэргүүн дэд ерөнхийлөгчөөр сонгосон бол Хөдөлмөрийн баатар, гавьяат тамирчин П.Сэрдамба Ерөнхий нарийн бичгийн даргын үүрэгт ажлаа үргэлжлүүлэн авч явах нь ээ.