Малийн хойд хэсгийн Кидал хотын зах дээр өчигдөр буюу баасан гаригт амиа золиослогч бөмбөг дэлбэлсний улмаас Чад улсын гурван цэрэг амь үрэгдэж, олон тооны хүн гэмтэж бэртжээ. Гэрчүүдийн мэдээлснээр биедээ тэсрэх бөмбөг бүхий хантааз өмссөн амиа золиослогч Чадын армийн цэргүүдийн ойролцоо очин, бөмбөг дэлбэлснээс гурван цэрэг амь үрэгдэж, дөрвөн цэрэг гэмтэж, шархадсан байна.

Үүний зэрэгцээ өчигдөр Малийн армийн нисдэг тэрэг Севарэ хотын ойролцоо осолдсоноос таван цэрэг амь үрэгджээ. Одоогоор Малийн албаныхан нисдэг тэрэгний ослын шалтгааныг тодруулахаар ажиллаж байгаа юм байна.

Франц болон Чад улсын армийн цэргүүд өнгөрсөн нэгдүгээр сараас хойш Малийн хойд хэсгийн нутгуудыг лалын зэвсэгт босогчдоос чөлөөлөхөөр үүрэг гүйцэтгэж байгаа бөгөөд өнгөрсөн хугацаанд зэвсэгт босогчдын халдлага, дайралтын улмаас Чадын 30 орчим цэрэг амь үрэгдээд байгаа аж. Түүнчлэн Францын армийн зүгээс  Малид үүрэг гүйцэтгэж байгаа 4000 орчим цэргээ энэ сарын сүүлчээс эхлэн эргүүлэн татаж, энэ жилийн эцэс гэхэд 1000 орчимыг нь л үлдэхээр төлөвлөж байгаа билээ.