Нийслэлийн Сонгинохайрхан дүүрэг буюу УИХ-ын сонгуулийн 26 дугаар тойрогт АН-аас нэр дэвшсэн Л.Эрхэмбаяр, МАН-аас нэр дэвшсэн Д.Сумъяабазар нар УИХ-ын гишүүний суудлын төлөө дахин өрсөлдөхөөр болсон билээ. Гурван мандаттай Сонгинохайрхан дүүргийнхэн “МАХН-МҮАН”-ын “Шударга ёс” эвслээс нэр дэвшсэн Д.Тэрбишдагва, АН-аас нэр дэвшсэн Л.Эрдэнэчимэг нарыг УИХ-ын гишүүнээр сонгосон бол энэ сарын 14-нд буюу ирэх ням гарагт гурав дахь төлөөллөө Төрийн ордон руу илгээнэ. Өнгөрсөн жилийн сонгуулиар АН-ын нэр дэвшигч Л.Эрхэмбаяр 26.9 хувийн, МАН-ын нэр дэвшигч Д.Сумъяабазар 25.1 хувийн санал авч гурав, дөрөвт эрэмбэлэгдсэн тул дахин сонгууль явуулахаар болсон юм. Учир нь УИХ-ын сонгуулийн тухай хуулиар сонгогчдын 28 хувийн санал авч байж УИХ-ын гишүүн болох ёстой.

Тэгэхээр энэ удаагийн дахин сонгуулиар УИХ-ын танхимд сууж буй 74 гишүүн дээр хэн нь нэмэгдэх нь тодорхой болно. Ямартаа ч энэ удаагийн санал хураалтаар АН-ын гишүүн Л.Эрхэмбаяр ялалт байгуулвал УИХ-д суугаа АН-ын гишүүд 35 болно. Гэхдээ АН-ын гишүүдийн тоо нэмэгдсэн ч “МАХН-МҮАН”-ийн “Шудрага ёс” эвсэлтэй хамтран байгуулсан засагт ямар нэгэн өөрчлөлт орохгүй. Харин Сонгинохайрханчуудад Ардчилсан Засгийн газрын хөгжил, дэвшил, бүтээн байгуулалтын ажлыг дүүрэг, хороондоо хурдацтай, бүрэн дүүрэн хэрэгжүүлэх боломж нээлттэй болох давуу талтай гэж хэлж болно.

Хэрвээ Д.Сумъяабазар ялалт байгуулвал МАН-ын гишүүдийн тоо 25 болох бөгөөд сөрөг хүчний хүч нэмэгдэнэ гэсэн үг юм. Тиймээс Засгийн газрын бодлогоор хийгдэх ажлуудад хүч нэмэгдүүлж, хөлс урсгая гэвэл Л.Эрхэмбаярыг, харин буйдантай жагсаж, хурал орхин гардаг сөрөг хүчний тоог нэмэгдүүлэе гэвэл Д.Сумъяабазарыг сонгоно. Ямартаа ч сонголт Сонгинохайрханчуудын гарт байна. тиймээс ирэх ням гарагт аль намын гишүүн ялалт байгуулахыг харах л үлдлээ.