УИХ-ын чуулганы хуралдаанаар Стратегийн ач холбогдол бүхий салбарт үйл ажиллагаа явуулж байгаа аж ахуйн нэгжид гадаадын хөрөнгө оруулалтыг зохицуулах тухай хуулийг хэлэлцэх эсэх асуудлаар хуралдаад, олонхийн саналаар дэмжихээр болсон байна. Гишүүд уг хуулийн төсөлтэй холбогдуулан дараах саналыг хэлсэн юм. Тухайлбал, гишүүн Б.Бат-Эрдэнэ “Буриадад гадаадын хөрөнгө оруулалтыг татах агентлаг тусдаа ажиллаж байна. Монголд 60 мянган ААН байгаагаас 40 мянга нь ажилладаггүй юм байна” гэдгийг онцолсон бол гишүүн Су.Батболд “Юм л болвол өмнөх Засгийн газар гэж буруутгахаа боль. Хөрөнгө оруулалт буурсан уу гэвэл буурсан. Чингис бонд өмнөх Засгийн газрын бий болгосон ажлын үр дүн хөрсөн дээр бий болсон. Нэг гараараа хамтарч ажиллая гээд, нөгөө гараараа өмнөх Засгийн газрыг буруутгаад байж болохгүй” гэх шүүмж хэлэв.

Хуулийн төслийн талаарх шүүмжид Эдийн засгийн хөгжлийн сайд Н.Батбаяр “Энэ хууль бол дэлхийд байхгүй хууль биш. Олон оронд бий. Чалкотой хийсэн гэрээг та нар хийгээ биз дээ. Түүнийг чинь засах гээд л ажиллаж байна” гэж ундууцав. Харин гишүүн Р.Гончигдорж “Гадаадын хөрөнгө орууулалт яагаад багасав гэдгийг улс төрийн өнцгөөр биш эдийн засгийн үндэслэлээр харах ёстой. Хуулинаас болов уу, юунаас болов уу гэдгийг тодорхой болгох хэрэгтэй” гэх санал хэлсэн юм.

Энэ хуулийн дараагаар Үнэт цаасны зах зээлийн тухай хуулийн шинэчилсэн найруулгыг мөн хэлэлцэх эсэх асуудлыг хэлэлцээд, дэмжсэнээр өнөөдрийн хуралдааныг өндөрлүүллээ. Уг хууль шинэчлэгдэн батлагдсантай холбоотойгоор  Аж ахуйн нэгжийн орлогын албан татварын тухай хууль,  Хувь хүний орлогын албан татварын тухай хууль, Хөдөө аж ахуйн гаралтай бараа, түүхий эдийн биржийн тухай хууль, Зар сурталчилгааны тухай хууль, Даатгалын тухай хууль, Санхүүгийн зохицуулах хорооны эрх зүйн байдлын тухай хууль, Аж ахуйн үйл ажиллагааны тусгай зөвшөөрлийн тухай хууль, Эрүүгийн хуульд нэмэлт, өөрчлөлт оруулах тухай хуульд өөрчлөлт орох аж.