Монголын Оюун Ухааны АКАДЕМИ-аас санаачлан зохион байгуулж буй “Ой тогтоолтын үндэсний аварга-2013” оюуны спортын гурав дахь удаагийн тэмцээний эцсийн шалгаруулалт ирэх бямба гарагт Классик Центрт зохиогдоно. Тус тэмцээний эхний шалгаруулалт өнгөрсөн долоо хоногт болж бага, дунд болон насан хүрэгчдийн ангилалд нийт 152 тамирчин ой тогтоолтын зургаан төрлөөр өрсөлдөж дүнгээ гарган эцсийн шалгаруулалтанд оролцох 38 тамирчны нэрс тодорлоо. Сүүлийн шатанд өрсөлдөх бага насны (12 хүртэлх нас) 14, дунд насны (13-17 нас) 9  болон насанд хүрэгчдийн (18-с дээш) ангилалд 15 тамирчид ой тогтоолтын 10 төрлөөр өрсөлдөнө.

Энэ удаагийн тэмцээн нь Дэлхийн ой тогтоолтын Оюуны Спортын холбоогоор баталгаажиж ерөнхий шүүгчээр ой тогтоолтын Олон Улсын 2-р түвшний шүүгч Энди ФОНГ ажиллахаас гадна манай тамирчдын гаргасан амжилт дэлхийн чансаанд бичигдэнэ.

Тэмцээний ивээн тэтгэгчээр MW Holding, Rich Construction, мэдээллийн ивээн тэтгэгчээр Рояль телевиз, Рояль ФМ 98.9, www.news.mn болон www.olloo.mn сайт оролцож байна.

Тус тэмцээний зорилго нь Монголын оюунлаг хүүхэд, залуусыг  хөхүүлэн дэмжих, хүн бүр оюуны чадамжаа дээд зэргээр ашиглаж их хэмжээний мэдээллийг богино хугацаанд тогтоон санаж болохыг харуулах, оюуны спортын олон улс, тив дэлхийн тэмцээнд оролцож Монгол улсынхаа нэрийг дэлхийн түвшинд гаргах оюуны спортын тамирчдыг тодруулах зорилгоор жил бүр уламжлал болгон зохион байгуулагдаж байна.

Өмнөх жилүүдэд зохиогдсон улсын аваргын тэмцээнд тэргүүлсэн тамирчид олон улс, дэлхий болон оюун олимп зэрэг олон олон тэмцээн уралдаанд амжилттай оролцож 18 медаль хүртсэн байна. Өнөөдөр манай тамирчдын дунд ой тогтоолтын олон улсын их мастер хоёр, цээж бодолтын дэлхий болон оюуны олимпын “Хүн хуанли” төрөлд, оюуны олимпын харааны ой тогтоолтын “Flash Number” төрөлд тус бүр нэг нэг аварга төрсөн байна.

Энэ удаагийн тэмцээнд бага, дунд насны ангилалд өрсөлдөж буй тамирчид дэлхийн дээд амжилтуудыг шинэчлэн тогтооно гэсэн итгэлтэйгээр бэлтгэж байна.
Тэмцээний талаарх дэлгэрэнгүй мэдээллийг www.mindsport.mn сайтаас болон 7011-9200 дугаараас лавлана уу!