Электроник, инди рок урсгалаар тоглодог Английн алдарт “Is Tropical” хамтлаг дөрөвдүгээр сарын 22-25-ны хооронд Монголд саатах гэж буй тухай баяртай мэдээ дуулгая. Тэд дөрөвдүгээр сарын 24-нд 20.00 цагт “iLoft function house”-т тоглолтоо хийхээр болжээ.  “Is Tropical” хамтлагийнхан Монголд видео бичлэг хийхээр ирж буй бөгөөд энэ хүрээнд Дархан хотын залууст мөн тоглолтоо хүргэх гэнэ.

“MTV video music awards”-ын шагналт “Is Tropical” хамтлагийн тухай сонирхуулъя.
“Is Tropical”   хамтлаг 2009 онд Английн Лондон хотноо Simon Milner, Gary Barber, Dominic нарын бүрэлдэхүүнтэй байгуулагдсан байна. Тэд 2010 оны нэгдүгээр сард гаргасан "When O’ When" синглээрээ олон нийтэд танигдсан ба удалгүй Францын хөгжмийн “Kitsune” студитэй хамтран ажиллахаар болсон байна. 2010 оны намраас тэд “Native To” нэртэй анхны цомгийн ажилдаа орсон бөгөөд эхний сингл “South Pacific” нь 2011 оны нэгдүгээр сард цацагдсанаар нэр хүнд нь түгэхэд нөлөөлсөн гэдэг.  Удалгүй  “Klaxons”, “The Big Pink”, “Mystery Jets”, “Good Shoes”  зэрэг хамтлагуудтай Их Британи болон Европын зарим орнуудаар аялан тоглолт хийжээ. 2011 оны зургадугаар сард удаан хүлээлгэсэн анхны цомог “Native To”-гээ хоёр дахь сингл болох “The Greeks”- тэйгээ зэрэгцүүлэн гаргажээ. “The Greek”-ийг гаргасан даруйд 2001 оны UК Music Video Awards-аас “Best Indie/Rock Video” номинацаар шагнал авсан юм. “YouTube” сайтад  уг видеог 3.5 сая орчим давтталтайгаар үзжээ. Тэд цомгийн дараагийн сингл болох “Lies”-ийг гаргаад, 2012 оны зун хүртэл АНУ , Япон зэрэг орнуудаар аялан тоглолт хийсэн байна. 2013 оны нэгдүгээр сард “Flags” нэртэй хураангуй  цомгоо “Visions”, “Drugzndreamz”, “Goodbye Leopold”, “Owen Pratt “зэрэг уран бүтээлчидтэй хамтран гаргасан байна. 

Хамгийн сүүлчийн үеийн мэдээлэл гэхэд, “Is Tropical”  хамтлаг хоёр дахь бүрэн хэмжээний цомгийн нээлтээ  “I’m Leaving” нэртэйгээр продюсер Luke Smith болон “Kitsune” студитэй хамтран 2013 оны тавдугаар сарын 20-нд  хийхээр төлөвлөж байна.

Ийнхүү Английн алдарт хамтлаг “Is Tropical”  хамтлаг Монголд ирж, тоглож байгаа нь  хөгжим сонирхогчдын дунд хүлээлт үүсгэлээ.

Хамтлагийн хит бүтээл “South Pacific” дууг сонсоно уу.