Хятадын өмнөд хэсгийн мужууд болон Шанхай хотод шувууны томуугийн “H7N9” вирусын өсвөрөөр өвчлөгсдийн тоо өнөөдрийн байдлаар 14 болж нэмэгдсэнээс зургаа нь нас бараад байгаа тухай “Синьхуа” агентлаг мэдээлжээ. Хятадын албаны мэдээгээр “H7N9” вирусын өсвөрийн халдвараар нас барсан зургаан хүний дөрөв нь Шанхай хотын оршин суугчид гэнэ. Үүнтэй холбоотойгоор Хятадын эрх баригчдын зүгээс Шанхай хотын тэжээвэр шувууны “Хухуай” захыг хааж,  шувууны томуугийн “H7N9” вирусын өсвөрийн халдвар илэрсэн олон зуун шувууг устгалд оруулсан байна. Гэхдээ “Синьхуа” агентлагийн зүгээс Шанхайд шувууны томуугийн “H7N9” вирусын өсвөрийн халдварын улмаас хичнээн тооны шувууг устгалд оруулсан талаар тодорхой мэдээлээгүй аж.

Үүний зэрэгцээ одоогоор эрдэмтэд шувуугийн томуугийн “H7N9”  вирусын өсвөр хүнээс хүнд халдсан эсэхийг хараахан бүрэн тодруулаагүй байгаа ч Хонгконгийн нисэх онгоцны буудлуудад өвчний халдвараас урьдчилан сэргийлэх арга хэмжээ авах болсон байна. Харин Японы нисэх онгоцны буудлуудын орох хаалган дээр Хятадаас ирж буй бүх зорчигчидод томуу, томуу төст өвчний шинж тэмдэгтэй бол эмнэлэгийн үзлэгт хамрагдахыг сануулсан бичиг байршуулжээ. Мөн Вьетнам улсын зүгээс Хятадаас тэжээвэр шувуу оруулах импортыг хориглосон байна. АНУ-ын зүгээс шувууны томуугийн “H7N9”  вирусын эсрэг вакцин гаргах ажлыг хэдийнэ эхлүүлээд байгаа бөгөөд вакциныг 5-6 дараагаас үйлдвэрлэж эхлэхээр төлөвлөжээ. Түүнчлэн Дэлхийн эрүүл мэндийн байгууллагаас АНУ-аас гадна Хятад, Их Британи, Австрали, Япон зэрэг улсуудад шувууны “H7N9”  вирусын эсрэг вакцин гаргаж авахыг санал болгож, шалгарсан нэг улсад үүнийг үйлдвэрлүүлэхээр зэхэж байгаа аж.

Үүний зэрэгцээ эдийн засагчдын үзэж буйгаар Хятадын худалдаа арилжаа, санхүүгийн чухал төв болоод буй Шанхай хотод шувууны томуугийн шинэ өсвөр илэрсэн нь эдийн засагт сөргөөр нөлөөлж, энэ байдал нь Ази дахь дэлхийн санхүүгийн төв Хонгконгт ч муугаар нөөлөх гэнэ. Хятадын агаарын тээврийн газраас хийсэн мэдээллээр шувууны томуугийн “H7N9” вирусын өсвөрийн халдвар илэрснээс хойш өмнөд, зүүн нутгуудыг зорих зорчигчдын тоо эрс багассан байна.