Мэдээж хэрэг, энэ өдөр эмчийн цагаан халаад нөмрөн, эрүүл энхийн манаанд зогсоно хэмээн сэтгэл нь догдолсон оюутнууд маргаашийн тухай, өнөөгийн эрүүл мэндийн салбарын тухай тийм ч бодитой төсөөлөлгүй байгаа. Жил бүрийн элсэлтийн шалгалтаар сурагчид Анагаахын сургуулийг зүглэж, жил бүрийн төгсөлтийн баяраар шинэхэн эмч нар зуу зуугаараа эрүүл мэндийн салбарт хөл тавьж байдаг энэ үзэгдэл бидэнд танил мэт боловч Монголын эрүүл мэндийн салбарын гал голомт болсон анагаах ухааны мэргэжилтнийг ямар төлөвлөгөө, зорилготойгоор бэлтгэж, ирээдүйн эмч нарын хөрс суурь хэрхэн тавигдаж байгааг сонирхохоор ЭМШУИС-ийг зорилоо.
Эрүүл мэндийн шинжлэх ухааны их сургууль 70 жилийн түүхэндээ 27 мянга орчим эмнэлгийн мэргэжилтэн бэлтгэжээ. Энэ жилийн хувьд тус сургууль 16 мэргэжлийн 1124 оюутныг салбартаа хүлээлгэн өгч байна. Ерөнхий мэргэжлийн эмч, уламжлалт анагаах ухаан, нүүр ам судлал, нийгмийн эрүүл мэнд, сувилахуй, эх барих, бага эмч, шүдний техник, лаборант гэхчлэн эмнэлгийн бүхийл шат давхаргад хүрч ажиллах цагаан халаадтангууд энэхүү 1124 төгсөгчийг бүрдүүлнэ.
Хонхны баярын дуу дөнгөж мартагдах үеэс эхлэн энэ хүмүүсийн гарт эрдэнэт хүний амь нас атгагдах учир өнөөдөртөө төгсөлтийн баярын дуунд эгшиг хадаан зогсох шинэхэн эмч нарын өмнө илүү хүнд ачаа тэгнээстэй байдгаараа онцлог. Тийм ч учраас шинэ эмч нар төгсөх бүр тэдний зүг анхаарлаа хандуулж байх нь зүйн хэрэг юм. Эрүүл энхийн манаанд бүл нэмж байгаа шинэхэн эмч нар Хонхны баярын маргааш хаачих вэ… Энэ асуултад бид хариулт авахаар тус сургуулийн Сургалтын албаны дарга Д.Отгонбаяртай уулзлаа.
-Энэ олон зуун төгсөгчид бүрэн ажлын байраар хангагдах боломжтой юу гэсэн асуултыг юуны өмнө таниас сонирхох гэсэн юм?
-Их сургууль бол боловсролын үйлчилгээ үзүүлдэг байгууллага. Магадгүй аливаа сургуулийн үйл ажиллагааны эцсийн үр дүн бол төгсөгчид нь нийгмийн зах зээлд хир зэрэг ажлын байраар хангагдаж байна гэдгээр тодорхой үнэлэмж, хэмжүүр гарах ёстой байх. Гэхдээ их, дээд сургууль бол тухайн хүнд баклаврын, магистрын, докторын, дипломын дөрвөн шатны боловсролыг л олгож байгаа болохоос биш, ажлын байраар хангана гэсэн баталгаа, бодлогыг баримтлахгүй шүү дээ. Харин хариуцсан салбарын яамдууд бодлого төлөвлөлт, хүний нөөцийн төлөвлөлтөө хийж байх ёстой. Манай сургуулийн тухайд 2007 оноос хойш Эрүүл мэндийн хуулиндаа өөрчлөлт оруулсантай холбоотойгоор эмчлэх эрхийн лицензийг хойшлуулж, хоёр жил дараалан дадлагажигч эмчээр ажилласан тохиолдолд эмчлэгч эрхийн лицензээ авна гэсэн заалт оруулсан. 2007, 2008 онд хуулинд өөрчлөлт орсонтой холбоотойгоор Эрүүл мэндийн хөгжлийн үндэсний төв, Нийслэлийн эрүүл мэндийн газрын хамтарсан тушаалаар тухайн үед ангагаахын ангийг төгссөн оюутнуудыг элссэн үндсэн харьяаллын дагуу хуваарилж, хоёр жилийн хугацаанд ажиллуулсан. Тэдгээр төгсөгчид ихэвчлэн өрх, сумын эмнэлгийн төвшинд эмнэлгийн тусламж үйлчилгээнийхээ нэгдүгээр шатлалд очиж ажилласан. Энэ жилийн тухайд бидэнд албан ёсоор оюутнуудыг хуваарилах талаар мэдэгдэл ирүүлээгүй байна. Харин жил бүр аймгуудын эрүүл мэндийн хүний нөөц хариуцсан мэргэжилтнүүд нь төгсөлт болж байгаа энэ цаг үед тухайн аймаг, орон нутагт ямар нарийн мэргэжлийн эмч хичнээн дутагдалтай байгаа талаарх бүх судалгааг танилцуулдаг. Мөн төчнөөн жил ажиллах хугацаанд байр орон сууцаар хангах зардлыг даах, цалин мөнгөний үнэлэмжийн талаар тохиролцож, хүний нөөцөө бүрдүүлдэг учиртай. Орон нутагт төгсөгчид огт очиж ажиллахгүй байгаа гэж хэлж болохгүй. Нийт төгсөгчдийнхөө массыг харах юм бол дийлэнх буюу 80 гаруй хувь нь ажлын байраар хангагдаж байгаа. Улаанбаатар хотоос төгсөгчдийн хувьд дийлэнх нь цаашид өөрсдийнхөө мэргэжлээр гүнзгийрэн суралцах сонирхолтой байдаг бол орон нутгаас ирж төгсөгчид орон нутагтаа ажиллаж байна. Тэгээд ч хуулинд өөрчлөлт орсонтой холбоотойгоор зургаан жил суралцаад төгсөнгүүтээ резидентурын сургалт буюу нарийн мэргэжлийн сургалтанд суралцах боломж нь хаагдаж байгаа юм. Нөгөөтэйгүүр ажлын байран дээр очиж дадлагажиж байж, цаашид нарийн мэргэжлээр суралцах нь үр дүнтэй гэдэг үүднээс оруулсан хуулийн заалт юм.
-Сэтгэл мэдрэлийн эмнэлэг буюу бидний хэлж заншснаар Шар хадны эмнэлэгт дадлагаар ажилласан оюутнууд ихэвчлэн мэдрэлийн эмч болохоос татгалзах, эсвэл тухайн эмнэлэгт ажиллах мэргэжлийн эмчийн дутагдал үүсдэг. Зарим нарийн мэргэжлийн эмчийг хэрэгцээт салбарт нийлүүлэх талаар сургуулийн зүгээс хамтарч ажилладаг уу?
-Сэтгэцийн эрүүл мэндийн чиглэлээр бид байнга эмч бэлтгэдэг. Харин хуулинд өөрчлөлт орсноор төгсөгчид өөрсдөө нарийн мэргэжлээ сонгодог болсноор зарим мэргэжлийн эмч нарын тухайд дутагдалтай тал байгаа. Хуучин бол нийгмийнхээ эрэлт хэрэгцээ, онцлогтой уялдаад зургаан жил бакалаврын боловсролоор бэлтгээд, дөрөв тавдугаар курсээс нь хүүхдийн эмч, мэс заслын эмч, мэдрэлийн эмч гээд салгаад нарийн мэргэжил олгочихдог байсан. Одоогийн боловсролын хуулийн шатлалаар бол докторын зэргийн хэмжээний боловсон хүчнийг бэлтгэж байсан. Одоо бол ангагаах ухааны боловсролын тогтолцоо төгсөлтийн өмнөх, төгсөлтийн дараах гэсэн шатлалтай болчихсон. Төгсөлтийн өмнөх гэдэг бол зөвхөн тухайн мэргэжлийн суурь боловсрол юм. Түүнээс гараад анхан шатлалын эмнэлгийн салбаруудад ажиллах, түүний дараа харин цааш хоёр гурван жилээр өөрөө сонгон нарийн мэргэжлээр сурах эрх нь нээлттэй. Хүүхдийн эмчийг 1996 оноос өмнө тусгай ангиар бэлтгэж байсан. Дэлхий нийтээр өвдсөн хойно нь араас нь хөөж эмчлэх биш, өвдөхөөс өмнө урьдчилан сэргийлэх, хүн амаа эрүүл байлгах чиглэлд нь түлхүү эмч нараа бэлтгэе гэсэн тунхаглалыг НҮБ-аас 1978 онд гаргасан. Энэ утгаараа ерөнхий мэргэжлийн эмч бэлтгэж байна. Үүний дараа ерөнхий мэргэжлээсээ нь төрөлжсөн нарийн мэргэжлийн эмч бэлтгэх сургалтаар 23 мэргэжлийн чиглэлээр сонгон суралцах боломж 2007 оноос бүрдсэн. Тэгээд ч хүүхдийн эмчийн чиглэлээр суралцаж байгаа хүмүүс тодорхой хэмжээнд байгаа боловч суралцагчийн тоо харьцангуй буурсан. Хүүхдэд үзүүлж байгаа эрүүл мэндийн тусламж үйлчилгээ, улсаас хүүхдэд үзүүлэх эрүүл мэндийн үйлчилгээг бүрэн хариуцах, эрүүл мэндийн хууль зэрэгтэйгээ уялдаа холбоог бодлогоор зохицуулах хэрэгтэй байх. Мөн хүүхдийн эмч болох сонирхол нь ч буурсан байх. Манай хүн амын дийлэнх хувь буюу 40 орчим хувь нь хүүхэд, залуучууд гэдэг утгаараа хүүхдийн эмчийн эрэлт хэрэгцээ хаа сайгүй ихсэж байгаа нь нууц биш. Харин эмчийн сургалтыг бүр хаачихсан гэсэн ойлголтыг албаны хүний хувьд бол үгүйсгэж байна. Яагаад энэ мэргэжлийг сонгохгүй байгаа нь тухайн мэргэжлийн тухайд хүүхэд өсөлтөөсөө шалтгаалаад эрхтэн системийн хувьд ч бүрэн тогтворжиж чадаагүй, өвчнөө тодорхойлох чадвараар муу, наснаас хамаараад өөр өөр, хэрэглэх эм тариа нь хүртэл өөр байдаг зэрэг мэдлэг, ур чадвар шаардсан байдаг нь нөлөөлдөг байх.
-Ирэх хичээлийн жилд Төрийн сангийн зээлээр хичнээн оюутан авах вэ?
-Бусад сургуулиудын жишигтэй л адилхан. Элсэн орж байгаа оюутнууд төрийн сангийн зээлд хамрагдах материалаа журмын дагуу бүрдүүлээд өгөх юм бол хариуцсан мэргэжилтэн маань төрийн сангийн хурлаар оруулаад шийдвэрлүүлдэг. Харин энэ зээлд хамрагдаад төгссөн оюутнууд маань анх буцааж төлөх гэрээний дагуу л шийднэ.
-Энэ жил хичнээн тооны оюутан элсүүлэх вэ?
-Их сургуулийн даацын хувьд жил ирэх тусам эмч болох хүмүүсийн тоо ихсэх хандлагатай байна. Тэр бүхнийг бид элсүүлнэ гэвэл сургуулийн даац, чадлын хэмжээ хүчрэхгүй. Анагаахын ангид 200-300 оюутныг шинээр элсүүлнэ. Манай сургуулийн тухайд эрэлтээ дагаад босго оноо чухал биш болсон юм шиг байна лээ. Өнгөрсөн онд босго оноо 580-аар тогтоож байсан ч 80 хувь нь 800 оноог давж орж ирсэн хүүхдүүд байсан.
-Танай Нүүр, ам судлалын сургууль шинээр байртай болох гэж сонссон. Энэ талаар тодруулахгүй юу?
-32-ын тойрог орчимд байдаг Төрийн өмчийн хорооны хуучин барилгыг манайд шилжүүлсэн юм. Тэнд Нүүр, ам судлалын сургуулийг шилжүүлсэн. Зориулалтаар ашиглалгүй нилээд удсан, дулааны шугамд холбогдоогүй байгууламж учир өөрсдийн боломжоор засч янзлан, ирэх хичээлийн жилд Нүүр, ам судлалын сургуулийг нүүлгэх төлөвлөгөөтэй л ажиллаж байна. Нүүр, ам судлалын бүх үйлчилгээ, сургалт, шинжилгээ, эмнэлэг нь бүгдээрээ тийшээ нүүх юм. Бид өөрсдөө л үүнийгээ тохижуулж авахын тулд тал тал тийшээгээ олон улсын хандивлагч байгууллагад хандан ажиллаж байна.
Д.ДолгорсҮрэн