Хойд Солонгос Кэсон хот дахь хоёр орны хамтарсан аж үйлдвэрийн цогцолборт ажилладаг Өмнөдийн олон зуун ажилчныг өчигдөр өглөө тус бүсэд нэвтрэхийг нь хоригложээ. Өмнөд Солонгосын албаныхны мэдээлснээр Хойд Солонгос Кэсон дахь аж үйлдвэрийн цогцолборт ажилладаг Өмнөдийн 446 ажилчныг цогцолборт нэвтрэхийг хориглосон байна. Хойд Солонгоын талаас Кэсон дахь аж үйлдвэрийн цогцолборыг хаах тухай мэдэгдсэн билээ.

Кэсон үйлдвэрийн цогцолборт 120 орчим компани үйл ажиллагаа явуулдаг бөгөөд Хойд Солонгосын 54 мянга, Өмнөд Солонгосын 860 гаруй иргэн ажилладаг тухай ВВС агентлаг мэдээлжээ.

Хойд Солонгосын зүгээс өнгөрсөн долоо хоногт Өмнөд Солонгос болоод АНУ-ын эсрэг дайны цэрэгжилтийн байдал зарласан тухай мэдэгдсэнээс хойш Солонгосын хойгт түгшүүртэй байдал үүсээд буй юм. Түүнчлэн Хойд Солонгос өчигдөр АНУ болон Өмнөд Солонгосын хамтарсан цэргийн сургуулийг эсэргүүцэн Йонбён дахь цөмийн цогцолборын үйл ажиллагааг дахин сэргээхээр төлөвлөж буйгаа мэдэгдсэн билээ.