Сагсан бөмбөгийн Үндэсний супер лигийн 3-р тойргийн тоглолт үргэлжилж байна. Хуваарь ёсоор өчигдрийн /04.01/ эхний тоглолт “Эхлэл” болон “Энержи Ресурс Харцага” багуудын хооронд боллоо. Эдгээр багуудын хувьд легионер тоглогчидгүй гэдгээрээ онцлогтой.

Тоглолтын эхний үед багууд тун ойрхон өрсөлдөж, Харцагууд 27-23-н харьцаатай тэргүүлсэн. Энэ үед Харцагаас Э.Мөнгөншагай 14 оноо авсан бол, Эхлэлээс Б.Билгүүн 13 оноо авч багаа тэргүүлэв.Харин тоглолтын 2-р үед Эхлэлчүүд тун сайн тоглосон. Б.Билгүүний дараалсан гоё оролтууд амжилттай болж байсан бол Б.Даваажавын холын зайн шидэлтүүд цагариганд орж байлаа. Харин “Харцага”-уудаас Б.Дорждамба хамгийн олон оноо авсан. Ингэснээр эхний хагас 54-52-р “Эхлэл” багийн давамгайллаар өндөрлөсөн байгаа.

Тоглолтын 3-р үед “Энержи Ресурс Харцага” багийн тоглолт сэргэсэн байлаа. 3-р үе эхлэнгүүт Харцагачууд дараалсан 11 оноо авч, оноог 63-54-р тэргүүлэх болсон. Мөн холын зайн мэргэн бууч Б.Нэмэхбаярын 3 дараалсан алсын зайн шидэлт амжилттай болсоноор энэ үед 16 оноо авсан. Ингэснээр 3-р үе 87-72-р Харцагуудын давамгайллаар өндөрлөсөн. Гэхдээ тоглолтын 4-р үе хамгийн сонирхолтой өрнөлөө. 15 оноогоор хожигдож байсан Эхлэлчүүд энэ үед гайхалтай сайн тоглосон. Багийн лидер Б.Даваажав энэ үед 10 оноо авсан. Мөн Б.Билгүүний оролтуудыг энэ өдөр зогсоох хүн байсангүй. Мөн чухал үед Түвдэнгийн холын зайн шидэлт орсоноор онооны харьцааг 103-103 болгон тэнцүүлсэн. Гэхдээ шийдвэрлэх үед, Харцагуудын холбон тоглогч Г.Баттөрийн оролт амжилттай болж , мөн Б.Одбаяр маш чухал бөмбөг тасалж, улмаар хурдан довтолгооноо амжилттай болгосон. Улмаар тоглолтын төгсгөлд “Эхлэл” довтолгооны самбараас бөмбөг авч, хэд хэд довтолсон ч цагариганд оруулж чадсангүй. Ингэснээр 107-103-н харьцаатай “Энержи Ресурс Харцага” хожиж, дараалсан 4 дэх ялалтаа авлаа. Тэд ингэснээр 10-5 гэсэн амжилтаар, “Танан Гарьд” багтай ижил боллоо. Тэднээс Б.Нэмэхбаяр 25 оноо, Э.Мөнгөншагай 18 оноо, Б.Дорждамба 18 оноо, Г.Баттөр 16 оноо авчээ. Харин “Эхлэл”-с Б.Даваажав 30 оноо, Б.Билгүүн 28 оноо, Түвдэн 18 оноо, Э.Ууганбат 15 оноо авчээ

Өчигдрийн хоёр дахь тоглолт хүснэгтийн 5, 6-р байрт бичигдэж байсан “SBL Хүлэгүүд” болон “TLG-13” багуудын хооронд болсон байгаа. Тоглолтын эхлэлийг “TLG-13” тун сайн хийж, 17-2 гэсэн оноогоор давамгайлж эхлүүлсэн. Мөн тэдний төвийн тоглогч Э.Цэрэнбаатар гэмтлээс эргэн ирсэн байлаа. Ингэснээр эхний үеийг “TLG-13” 26-16-н харьцаатай давамгайлж өндөрлүүлсэн.

Тоглолтын 2-р үе тун өрсөлдөөнтэй эхэлсэн. Үеийн эхэнд “TLG-13”-н довтлогоонууд амжилттай болж, Г.Цэнгүүнбаяр 3 онооноос тун хэцүү шидэлтийг амжилттай болгосон. Мөн Э.Цэрэнбаатар, О.Цэлмэг нарын оролтууд амжилттай болж байсан. Гэхдээ энэ үед “SBL Хүлэгүүд” энэ үед онооны зөрүүг арилгаж чадсан. Тэд багаараа тун жигдхэн сайн тоглож, З.Дэлгэрням, М.Мөнхтөр, Chris Lawson-ний довтолгоонууд, О.Сэргэлэнгийн дамжуулалтууд амжилттай болж байлаа. Ингэснээр эхний хагаст тэд оноог 45-46 болгож ойртуулж чадсан. Улмаар 3-р үед “SBL Хүлэгүүд”-ийн сайн тоглолт үргэлжилж, оноогоор илүүрхэж эхэлсэн.Мөн энэ үе олон сонирхолтой үзүүлбэрүүдээр дүүрэн болсон. Ялангуяа “SBL Хүлэгүүд” багийн холбогч Chris Lawson-ий дамжуулалтаар, довтлогч Б.Билгүүн цагариган дээрээс тохсон нь энэ өдрийн оргил мөчүүдийн нэг байсан. Мөн Devon Clark, О.Сэргэлэн, Lawson-ний довтолгоонууд амжилттай болж байлаа. Харин “TLG-13”-с Kendrick Black, D’Andre Brown нар хүчтэй слэм данк хийсэн. Мөн энэ үеийн төгсгөлд цаг дуусахтай зэрэгцэн Black-н 3 онооны шидэлт орсон. Ингэснээр 3-р үед “SBL Хүлэгүүд” 76-72-н харьцаатай тэргүүлсэн.

Харин тоглолтын 4-р үед тун өрсөлдөөнтэй, сонирхолтой явагдаж эхэлсэн. SBL-н довтлогч Б.Билгүүн бөмбөг таслаад, мөн л хүчтэй тохолтоор, үзэгчдэд бэлэг барьсан. Ингээд тоглолтын цаг дуусахад 4 минут дутуу “SBL Хүлэгүүд” 96-86-н харьцаатай тэргүүлж байх үед төвийн тоглогч Devon Clark сул гаран, цагариганд довтлох үед, самбар нурсан. Ингэснээр тоглолт завсарлалаа. Энэхүү тохиолдол нь монголын сагсан бөмбөгийн түүхэнд анх удаагаа гарч байгаа бөгөөд одоогоор асуудлыг яаж шийдэх талаар тодорхой шийдвэр гараагүй байна. Үүнээс өмнө “SBL Хүлэгүүд” багаас Devon Clark 20 оноо, Chris Lawson 15 оноо, Б.Билгүүн 15 оноо, З.Дэлгэрням 14 оноо аваад байжээ. Харин “TLG-13” багаас Kendrick Black 19 оноо, Г.Цэнгүүнбаяр 18 оноо, D’Andre Brown 15 оноо, Э.Цэрэнбаатар 13 оноо авсан байна.

МҮСБХ-ны “ Үндэсний Супер лиг”-ийн 3 дугаар тойргийн хуваарь:

04 сарын 03-нд:

1. Эхлэл MBM – БЗ Буллс
2. ER Hаwks – Эрдэнэдрийлинг Rigs

04 сарын 08-нд:

1. Танан Гарьд – SBL Shаrks
2. Эрдэнэдрийлинг Rigs – TLG 13

04 сарын 15-нд:

1. Эхлэл МВМ – SBL Shаrks
2. БЗ Буллс – ER Харцага

04 сарын 17-нд:

1. Танан Гарьд – Эрдэнэдрийлинг Rigs
2. ER Hаwks – TLG 13

04 сарын 19-нд:

1. Эхлэл МВМ – Эрдэнэдрийлинг Rigs
2. SBL Shаrks – БЗ Буллс

04 сарын 22-нд:

1. Танан Гарьд – TLG 13