Хар тамхи хэрэглэж, хадгалсан хэрэгт сэжигтнээр татагдаад байсан Ш.Батбаяр буюу “Дижитал” хамтлагийн ахлагч Баавар нарын дөрвөн хүнд холбогдох хэргийн Шүүх хурал өнөөдөр Чингэлтэй дүүргийн шүүхэд боллоо.

Баавар нь өмнөх Шүүх  хуралд ирээгүй гэх үндэслэлээр Цагдан хорих 461-р ангид саатуулагдаж байх үедээ тодорхойгүй шалтгаанаар түлэгдэж, биеийн байдал нь муу байгаа тул өнөөдрийн хуралд тэрээр ирээгүй юм.  Бааварын биеийн байдал муу байгаа тул хэргийг тусгаарлаж шүүх саналыг Улсын яллагч өнөөдөр Шүүх бүрэлдэхүүнд гаргасан ч уг саналыг Шүүх бүрэлдэхүүн хэлэлцэж үзээд, хэргийг тусгаарлах боломжгүй гэж үзэн, тодорхойгүй хугацаагаар түдгэлзүүллээ.

Тиймээс Бааварын биеийн байдлаас шалтлаалан уг хэргийг хэзээ хэлэлцэхээ шийдэх юм байна.

Сануулахад, Ш.Батбаяр, Т.Алтай, Г.Адьяасүрэн  нарыг Эрүүгийн хуулийн 192.3.4, 192.3.5-т зааснаар буруутгаж,  яллах дүгнэлт үйлдүүлэхээр шүүхэд шилжүүлжээ.  Тэднийг зүйлчилж буй Эрүүгийн хуулийн 192.3.4, 192.3.5-д мансууруулах буюу сэтгэцэд нөлөөлөх эм, бэлдмэл, бодисыг борлуулах зорилгоор хууль бусаар бэлтгэсэн, олж авсан, хадгалсан, тээвэрлэсэн, илгээсэн, борлуулсан, мөн уг хэргийг давтан, урьдчилан үгсэж тохиролцсон буюу зохион байгуулалттай бүлэг, гэмт бүлэглэл үйлдсэн  гэх үндэслэлүүд юм. Хэрэв шүүхээр гэм буруутай нь тогтоогдвол 10-15 жил хүртэл хугацаагаар хорих ял шийтгэхээр хуульд заажээ.