Эрүүл  мэндийн салбарын удирдах ажилтны зөвлөгөөн энэ сарын 3-4-ний хооронд Эрүүл мэндийн яаманд болно. Зөвлөлгөөний үеэр сайд Н.Удвал “Эрүүл мэндийн салбарт баримталж буй шинэчлэлийн бодлого” сэдвээр илтгэл тавих бол, Төрийн нарийн бичгийн дарга Ж.Хатанбаатар “Эрүүл мэндийн тухай хуульд нэмэлт өөрчлөлт оруулах тухай хуулийн үзэл баримтлал”-ын талаар танилцуулга хийх юм. Түүнчлэн “Эрүүл мэндийн салбарын хариуцлага, хяналт, сайжруулах арга зам”, “Эрүүл мэндийн тусламж үйлчилгээний чанар аюулгүй байдлын судалгааны дүн, Үндэсний зорилт”-ын танилцуулга болон “Эрүүл мэндийн мэдээллийн технологийн шинэчлэл” зэрэг сэдэвт илтгэл тавигдана.

Өрхийн болон сумын эрүүл мэндийн төвүүдийн талаар, мөн эрүүл мэндийн технологийн нэгдсэн бодлогын талаар, аймгийн оношилгооны төв, эрүүл мэндийн санхүүжилтийн шинэчлэл хийгээд эмийн чанар, аюулгүй байдлын талаар илтгэл танилцуулж, хэлэлцүүлэг өрнүүлэх юм байна. Эрүүл мэндийн яамнаас 2013 оныг “Хариуцлага, хяналтыг сайжруулах жил” болгон зарлаж энэ жилийн хүрээнд хийх ажлаа мөн танилцуулахаар төлөвлөж байна. Зөвлөгөөнд Эрүүл мэндийн сайд Н.Удвал, дэд сайд Ж.Амарсанаа, Төрийн нарийн бичгийн дарга Ж.Хатанбаатар болон газар, хэлтсийн дарга нар, ДЭМБ-ын суурин төлөөлөгч, НҮБ-ын ХАС-ын суурин төлөөлөгч, НҮБ-ын ХС-ын суурин төлөөлөгч, АХБ-ны суурин төлөөлөгчид оролцохоос гадна Улаанбаатар хотын болон хөдөө орон нутгийн эмнэлгийн удирдлагууд оролцох аж.