МҮБХ-ноос зохион байгуулдаг Бизнес барилдаан өнгөрсөн амралтын өдөр /03.30/ болж, улсын харцага А.Цацабшир, улсын начин Б.Гончигдамба, Н.Батзаяа, Б.Сангисүрэн, Р.Пүрэвдагва, Б.Пүрэвсайхан, аймгийн арслан Ч.Батчулуун, О.Гантулга, А.Отгонбаатар, Б.Баатарцол, Л.Шинэбаатар нарын тэргүүтэй улс, аймгийн алдар цолтой 128 бөх зодоглов. Барилдаанд Увс аймгийн Хяргас сумын харьяат, “Хүч” спорт хороо, “Увс нуур дэвжээ”, Нийслэлийн хэв журмыг хамгаалах газар, Дарханы төмөрлөгийн үйлдвэрийн бөх, улсын начин С.Батсуурь түрүүлж, Төв аймгийн Баяндэлгэр сумын харьяат, “Сүлд” спорт хороо, “Дүнжингарав” дэвжээ, “Нью хаппи” группийн бөх, аймгийн хурц арслан Ч.Батчулуун үзүүрлэжээ.

Харин шөвгийн дөрөвт Дорноговь аймгийн Эрдэнэ сумын харьяат, “Хүч” спорт хороо, “Хутагтын хүчтэн” дэвжээний бөх, улсын харцага А.Цацабшир, Завхан аймгийн Их-Уул сумын харьяат, “Алдар” спорт хороо, “Завхан” дэвжээ, “Хөтөлийн цемент шохой” ХХК-ийн бөх, улсын өсөх идэр начин Б.Гончигдамба нар үлдсэн байна.