Сагсан бөмбөгийн үндэсний супер лигийн өчигдөр болсон тоглолтуудын мэдээллээс хүргэе. Хамгийн өрсөлдөөнтэй тоглолт “Танан Гарьд” болон “Баянзүрх Буллз” багуудын хооронд болж, нэмэлт цагт “Танан Гарьд” хожсоноор, супер лигт 10 хожил авсан эхний баг боллоо.

Эхний тоглолт хүснэгтийн 3,4-р байруудад бичигдэж байсан “Танан Гарьд” болон “Баянзүрх Буллз” багуудын хооронд болсон. Аль аль багуудын хувьд 3-р тойргийн 3 дахь тоглолтоо хийж, тойргийн тоглолтууд нь дуусах дөхөж байгаа учраас маш хариуцлагатай тоглолт болсон.

Тоглолт эхнээсээ л маш ширүүн өрсөлдөөнтэй эхэлж, багууд олон оноо авсан. Эхний үед “Баянзүрх Булзз”-с Э.Цэвэлдорж 8 оноо, Decorey Jones 7 оноо авсан бол, “Танан Гарьд”-с Ц.Азбаяр 9 оноо, О.Очирбат 8 оноо авсан. Ингэснээр эхний үеийг “Танан Гарьд” 30-27-р хошуучилсан.

Гэхдээ тоглолтын 2-р үед “Баянзүрх Буллз” оноог тэргүүлж чадсан. Ялангуяа Э.Цэвэлдорж гайхалтай тоглолт гаргаж, шидэлтүүд нь орж байснаар эхний хагаст 22 оноо авсан. Мөн холбон тоглогч Д.Мөнхтүвшин энэ үед гайхалтай хаалт тавьж, үзэгчдийг суудлаас нь босгосон. Ингэснээр эхний хагасыг 57-54-ын харьцаатай “Баянзүрх Буллз” тэргүүлж дуусгасан.

Тоглолтын 3-р үед  багууд тун ойрхон оноо авч, Буллзээс Т.Санчирын шидэлтүүд амжилттай болж, 10 оноо авч, мөн Э.Цэвэлдорж 7 оноо авчээ. Харин Гарьдуудаас Ц.Азбаяр чухал мөчид холын зайнаас оноо авч байснаар 9 оноог энэ үед авчээ. Ингэснээр 3-р үе 79-77-р Буллзийн 2 онооны илүүгээр өндөрлөсөн. Харамсалтай нь энэ үед “Баянзүрх Буллз” багийн гол холбон тоглогч Д.Мөнхтүвшин бэртсэн. Үүнээс өмнө тэрээр багтаа 11 оновчтой дамжуулалт өгөөд байсан юм.

Энэ тоглолтын шийдвэрлэх 4-р үе хамгийн өрсөлдөөнтэй, гайхалтай агшинуудаар дүүрэн тоглолт болсон. 4-р үе эхлээд Буллзын лидер Т.Санчирын ээлж дараалсан шидэлтүүд байндаа тусч байлаа. Гэхдээ Гарьдууд багийн О.Очирбат энэ үед Decoery Jones-н довтолгоон дээр гайхалтай хаалт хийж, багийнхаа тоглолтыг сэргээсэн. Улмаар Фредрик Вүүдс гайхалтай слэм данк хийсэн бол, үүний араас Ц.Азбаярын оролт амжилттай болсон. Мөн Antonio Jones-н гайхалтай дамжуулалтаар Вүүдс ээлжит слэм данкаа хийсэн. Гэхдээ хариуг нь “Баянзүрх Буллз”-н легионер Рафаел Харрис барьж, хүчтэй тохолт хийсэн. Мөн Т.Санчирын холын зайн шидэлт байндаа туссан бол, Б.Мөнхболд хариуг нь барьж, 2 багийн довтолгоонууд ээлж дараалан амжилттай болж байлаа. Ингэснээр үндсэн цаг 105-105-р тэнцээгээр өндөрлөсөн.

Харин нэмэлт цагт “Танан Гарьд” багийн дараалсан 2 довтолгоо амжилттай болж, мөн “Баянзүрх Буллз”-н лидер Т.Санчирын алдаа 6 болж талбайг чөлөөлсөн. Ингэснээр энэ тоглолтонд “Танан Гарьд” 115-111-р хожиж, 10-5 гэсэн амжилтаар, хүснэгтийг эргэн тэргүүлж эхэллээ. Тэднээс Ц.Азбаяр 27 оноо, Antonio Jones 22 оноо, 8 оновчтой дамжуулалт, Фредрик Вүүдс 20 оноо, 20 самбар, Б.Мөнхболд 18 оноо, 8 самбар, 7 оновчтой дамжуулалт өгчээ.

Харин “Баянзүрх Буллз”-с Э.Цэвэлдорж 38 оноо авч, дээд амжилтаа үзүүллээ. Мөн Т.Санчир 35 оноо, 12 самбар, 7 оновчтой дамжуулалт, Рафаел Харрис 14 оноо, 13 самбар авчээ. Тэд 8-7 гэсэн амжилтаар 4-р байранд бичигдэж байгаа.

2 дахь тоглолт “SBL хүлэгүүд” болон ”Эрдэнэдрийлинг Ригс” багуудын хооронд болсон. Энэ тоглолтонд “SBL хүлэгүүд” О.Сэргэлэн, Девон Кларк нарыг сэлгээнээс, “Эрдэнэдрийлинг Ригс” Н.Золжаргал, Dean Hadley нарыг сэлгээнээс тоглуулсан.

Тоглолтын эхний үед багууд тун ойрхон өрсөлдөж SBL-с Б.Билгүүн 7 оноо, Ригсээс Н.Өрнүүнбилэг 7 оноо авч, 17-13-р “SBL хүлэгүүд” эхний үед тэргүүлсэн.
Улмаар тоглолтын 2-р үед ч “SBL хүлэгүүд” тун сайн тоглож, нэг баг болж чадсан гэдгээ харуулсан довтолгоонууд хийж байлаа. Гэхдээ энэ үед Ригсийн легионер Dean Hadley, SBL-н легионер Chris Lawson-г хүчтэй блокдэж, үзэгчдийг суудлаас нь босгосон. Ингэснээр эхний хагаст “SBL хүлэгүүд” 37-31-р тэргүүлсэн.

Гэхдээ тоглолтын сүүлийн хагаст ”Эрдэнэдрийлинг Ригс” маш муу тоглож, ердөө 24 оноо авсан. Харин “SBL хүлэгүүд” багаараа тун идэвхитэй тоглож, сүүлийн хагаст 57 оноо авсан. Тэднээс Б.Билгүүн 23 оноо, 12 самбар, Marcus Hammonds 22 оноо, 13 самбар, Chris Lawson 15 оноо, 12 самбар, 7 оновчтой дамжуулалт, З.Дэлгэрням 12 оноо, 11 самбар авчээ. Ингэснээр 94-55-р “SBL хүлэгүүд” хожиж, 6-8 гэсэн амжилттай боллоо.

Харин “Эрдэнэдрийлинг Ригс”-с Dean Hadley 14 оноо, С.Өрнүүнбилэг 13 оноо, Н.Золжаргал 10 оноо авчээ. Тэд ийнхүү 9-5 гэсэн амжилттай болж байна.

Үндэсний супер лиг ирэх даваа гарагт Эхлэл – Энержи Ресурс Харцага, SBL Хүлэгүүд – TLG 13 багуудын тоглолтоор үргэлжлэн явагдана.